Сучасная форма камунікацыі з заяўнікамі

Па словах кіраўніка цэнтральнага рэгіёна, скарыстаўшыся анлайн-кансультантам, можна атрымаць адказы на пытанні за кароткі час. 

— Чалавек застанецца задаволеным, і зварот, калі ён не патрабуе дадатковага вывучэння, будзе зняты з парадку дня. Гэта сучасная форма, якая паказала сваю эфектыўнасць, — адзначыў Аляксей Кушнарэнка.

Дарэчы, першымі гэты праект апрабавалі ў Валожынскім райвыканкаме і прыйшлі да высновы, што значная частка паведамленняў датычылася тлумачэнняў парадку правядзення тых ці іншых дзяржпрацэдур, афармлення дакументаў, парадку работы службаў, гэта значыць насілі кансультацыйны характар.

860 электронных лістоў

Такая іх колькасць паступіла праз дзяржаўную сістэму ўліку зваротаў за 1-ы квартал 2026 года, а гэта на чвэрць больш, чым год таму. 

З 534 зваротаў у аблвыканкам у пачатку 2026 года толькі кожнае дзясятае запатрабавала ўмяшання. У астатніх выпадках мясцовыя ўлады справіліся самі. Значыць, сістэма працуе.

Кожны трэці зварот у Мінскі аблвыканкам у мінулым годзе датычыўся жыллёва-камунальнай гаспадаркі і стану жылога фонду.

Пры гэтым скаргаў на дарогі стала менш. Аднак вырасла колькасць калектыўных зваротаў (з 30 і больш подпісамі) — амаль на 60%. Часцей за ўсё людзі аб’ядноўваюцца, каб патрабаваць рамонт дарог (44 лісты), добраўпарадкаванне (27) або навядзенне парадку з транспартам (17).

Звяртайцеся ў «адно акно»

У вобласці працуюць 27 службаў «адно акно», уключаючы філіялы ў Фаніпалі, Заслаўі і Лошніцы. За 2025 год яны прынялі 211 297 заяў — на 2,5% больш, чым годам раней. Электронныя сістэмы кіравання чаргой дзейнічаюць ужо ў 15 службах (год таму іх было 13). Гэта істотна паскарае працэс.

Аднак Мінскі райвыканкам усё яшчэ пакутуе ад чэргаў. Менавіта адтуль паступае больш за ўсё скаргаў на парушэнне тэрмінаў.

Не даваць абяцанняў, якія немагчыма выканаць

На пасяджэнні аблвыканкама губернатар Мінскай вобласці паставіў задачу мясцовым органам улады — даводзіць пачатае да канца і не даваць абяцанняў, якія немагчыма выканаць.

— Яшчэ раз хачу нагадаць, мы павінны не толькі прымаць звароты грамадзян, але і выконваць гэтыя абяцанні. Раблю акцэнт на тым, каб быць уважлівымі, камунікабельнымі і кампетэнтнымі. Толькі так можна пабудаваць па-сапраўднаму эфектыўную і арыентаваную на чалавека дзяржаву, — сказаў кіраўнік вобласці.

Рэальным рашэннем праблем з’яўляюцца сустрэчы з уладай. З 8960 зваротаў, якія паступілі падчас сустрэч, 8076 былі закрытыя на месцы.

Задача на наступны год — не проста даваць адказы, а жорстка кантраляваць іх выкананне.

Яна ВАЛАСАЧ

Фота прэс-службы Мінскага аблвыканкама