На працягу ўсіх дзён фестывалю для гасцей будуць працаваць фуд-корты і выстаўка-продаж «Беларускія брэнды», дзе прадставяць харчовыя і нехарчовыя тавары айчынных прадпрыемстваў, інавацыйная прадукцыя Нацыянальнай акадэміі навук Беларусі і вырабы мясцовых майстроў. Апроч гэтага, гасцей і ўдзельнікаў чакае тры дні насычанай праграмы, дзе кожны знойдзе занятак па душы. 

Напрыклад, у першы дзень фестывалю Светлагорскі гісторыка-краязнаўчы музей запрашае ўсіх жадаючых паўдзельнічаць у праекце «Ежа з сэнсам» і пакаштаваць арыгінальныя стравы мясцовай кухні (16.00). А для юных талентаў у 18.00 у парку на вуліцы Калініна падрыхтаваны інтэрактыў «стАРТ»: разам з камандай беларускіх мастакоў хлопчыкі і дзяўчынкі завершаць яркае афармленне новага шматпрофільнага скейт-ролер парка. Натхненнем для роспісу сёлета стала самабытнае мастацтва саломапляцення. Завершыць першы дзень вячэрні кінапаказ фільма «Пераломны момант» пад адкрытым небам на Цэнтральнай плошчы ў 20.00.

У пятніцу, 5 чэрвеня, на сустрэчы «Беларусь — брэнд маладых» пройдзе карысны майстар-клас для пачынаючых аўтараў — усіх тых, хто хоча навучыцца пісаць пра сваю малую радзіму цікава і займальна. А ў 15.00 на Цэнтральнай плошчы стартуе спартыўна-гістарычны квэст ад Беларускай алімпійскай акадэміі па знакавых мясцінах Светлагорска. Дарэчы, ён атрымаў статус горада толькі ў 1960-х гадах, хаця першыя згадкі пра гэтую тэрыторыю адносяцца яшчэ да XVI стагоддзя.

Сёння ж, як горад маладзёжны, Светлагорск ганарыцца сваёй спартыўнай інфраструктурай: сучасны фізкультурна-аздараўленчы комплекс, басейн, стадыёны, тэнісны корт, новы лядовы палац. Яшчэ адным такім месцам прыцягнення светлагорцаў стане спартыўны аб’ект, які будзе падораны гораду Нацыянальным алімпійскім камітэтам Рэспублікі Беларусь у рамках фестывалю. Прэзентацыя шматпрофільнага скейт-ролер парка, які арганічна дапоўніць спартыўную і забаўляльную інфраструктуру горада, адбудзецца падчас афіцыйнай цырымоніі адкрыцця «Вытокаў» 5 чэрвеня ў 18.00 у парку на вуліцы Калініна.

Як і ў мінулым годзе, у фестывалі прыме ўдзел дэлегацыя камісіі спартсменаў Расіі — пераможцы і прызёры Алімпійскіх гульняў. Разам з беларускімі калегамі яны правядуць майстар-класы па фігурным катанні, хакеі, адзінаборствах, веславанні, лёгкай атлетыцы і іншых відах спорту. Яркім мерапрыемствам другога дня стане і спектакль «Родныя ў модным» у 20.00 на Цэнтральнай плошчы. Па-сапраўднаму ўнікальны тэатральны праект прадэманструе арыгінальнасць беларускай дызайнерскай думкі, а ўвасобяць ідэі ў жыццё артысты сталічнага ТЮГа і праекта «Роднае-моднае».

Субота, 6 чэрвеня, пачнецца з маштабнага Алімпійскага квэста ў 13.00 на Цэнтральнай плошчы. Яго юныя ўдзельнікі змогуць праверыць сябе на больш як трыццаці спартыўных лакацыях: напрыклад, пракаціцца на велатрэку ў віртуальнай рэальнасці, асвоіць прыёмы каратэ, дзюдо і барацьбы, а таксама прадэманстраваць валоданне гімнастычнымі прадметамі. Дапамагаць у гэтым будуць вопытныя трэнеры і вядомыя спартсмены — прызёры Алімпійскіх гульняў, чэмпіянатаў свету і Еўропы. За паспяховае выкананне заданняў дзеці змогуць атрымаць каштоўныя прызы: бесправадныя навушнікі, музычную Bluetooth-калонку або паўэрбанк.

Вячэрняя праграма суботы стартуе ў 17.00 выступленнем папулярных кавер-бэндаў. На музычным рынгу прагучаць усім вядомыя хіты ў новай апрацоўцы, а завершыцца свята вялікім канцэртам зорак беларускай эстрады ў 20.00 і яркім феерверкам у 23.00.

Аміна НАЗАРАВА

Фота Нацыянальнага алімпійскага камітэта Рэспублікі Беларусь