Чаму з 1 сакавіка з’явіліся новыя ўмовы абслугоўвання беларускіх мабільных абанентаў у роўмінгу на тэрыторыі Расіі (і наадварот)?

6 снежня 2024 года кіраўнікі Беларусі і Расіі падпісалі дакумент «Аб стварэнні камфортных тарыфаў для карыстання паслугамі сувязі і перадачы даных на тэрыторыі Саюзнай дзяржавы (адмена роўмінгу ў Саюзнай дзяржаве)».

Прадугледжваюцца больш камфортныя ўмовы для абанентаў сотавай сувязі абедзвюх краін. Дакумент — аб стварэнні выгадных для абанентаў тарыфаў на паслугі сувязі і інтэрнэту на тэрыторыі Саюзнай дзяржавы.

Чаму цяпер?

Зніжаны тарыфы на галасавую сувязь былі ў красавіку 2022 года, абаненты атрымлівалі 40 бясплатных хвілін на ўваходныя званкі, а выходныя аплачваліся па тарыфе 22–27 капеек за хвіліну. З 1 сакавіка супрацоўніцтва беларускіх і расійскіх сотавых аператараў дазволіла зрабіць тарыфы яшчэ больш камфортнымі і выгаднымі для грамадзян абедзвюх краін.

Чаму не варта хвалявацца з-за «адмены роўмінгу»?

Першае, што трэба разумець: роўмінг не адмяняецца, падкрэслілі ў Міністэрстве сувязі і інфарматызацыі Беларусі. Роўмінг — гэта сувязь: адмяніць роўмінг азначала б адключыць сувязь. Новаўвядзенні звязаны са змяненнем тарыфаў, тлумачыць прэс-служба Мінсувязі. З 1 сакавіка сувязь для абанентаў Расіі і Беларусі ў рамках Саюзнай дзяржавы стала больш камфортнай і выгаднай.

Што атрымліваюць абаненты?

У адпаведнасці з камфортным тарыфам роўмінгу, мабільныя аператары і Беларусі, і Расіі даюць сваім абанентам 150 хвілін на ўваходныя званкі, столькі ж хвілін на выходныя (пры ўмове, што яны ўваходзяць у тарыфны план), а таксама да пяці гігабайт інтэрнэту. Калі тарыф уключае бясплатныя хвіліны для званкоў у іншыя сеткі, то 150 з іх могуць быць выкарыстаны ў роўмінгу на выходныя званкі на беларускія нумары. Калі бясплатныя хвіліны на выходныя выклікі скончыліся, абанент аплачвае выходныя званкі па тарыфікацыі 22–27 капеек за хвіліну (канкрэтны кошт залежыць ад аператара). Кошт уваходных званкоў звыш бясплатных 150 хвілін — 11 капеек за хвіліну. Да 5 гігабайт мабільнага інтэрнэту будзе каштаваць у сярэднім да пяці беларускіх рублёў за 1 гігабайт (прыкладна столькі ж, колькі каштуе перадача даных унутры Беларусі), паведамілі ў Міністэрстве сувязі і інфарматызацыі.

Як «забраць» свае бясплатныя 300 хвілін?

Каб скарыстацца бясплатнымі хвілінамі, яшчэ на тэрыторыі Беларусі праверце, ці падключаны ў вас паслугі «Роўмінг» і «Перадача даных», адзначаюць у Мінсувязі: у адваротным выпадку роўмінг у вас не ўключыцца. Пераязджаючы граніцу паміж Беларуссю і Расіяй, вы атрымліваеце SMS ад свайго аператара аб умовах абслугоўвання. Па сутнасці, няма ніякіх адрозненняў ад роўмінгу, якім усе мы карысталіся раней, толькі тарыф ніжэйшы.

Такім чынам, абаненту больш рабіць нічога са сваім тэлефонам не трэба. Як правіла, да расійскага партнёра вашага беларускага аператара мабільнай сувязі падключэнне ідзе аўтаматычна. Бываюць адзінкавыя выпадкі, калі трэба ўручную выбраць аператара. У гэтым выпадку спатрэбіцца адзін-два клікі. Даведацца пра партнёраў A1, МТС і lіfe можа кожны абанент: гэта інфармацыя размешчана на сайтах аператараў. Але ў любога расійскага аператара-партнёра ўмовы абслугоўвання беларускіх мабільных абанентаў на тэрыторыі Расіі будуць аднолькавымі. Выкарыстаць бясплатныя хвіліны трэба на працягу 30 дзён.