Ежа, лекі і клопат аб пажылых

Як расказаў першы сакратар Мінскага гарадскога камітэта БРСМ Аляксей Пікус, у Мінску актыўна рэалізоўваецца ініцыятыва Мінскага гарадскога камітэта БРСМ «Снежны дэсант»: «З пачатку гэтага года каля 15 тысяч валанцёраў Беларускага рэспубліканскага саюза моладзі выйшлі на комплексную работу па ачыстцы снегу, тэрыторый, дапамогу інвалідам і пажылым людзям. Гэтая лічба з кожным днём павялічваецца. Актыўныя і мэтанакіраваныя маладыя людзі выходзяць на вуліцы горада дапамагаць установам адукацыі, аховы здароўя, прадпрыемствам, арганізацыям сталіцы прыбіраць снег. А таксама далучаюцца да ачысткі тэрыторый у дварах каля дамоў, транспартных сродкаў. Яны робяць свой унёсак у дапамогу камунальным службам горада і, вядома ж, Мінску ў цэлым. Наша галоўная мэта — дапамагчы ўсім, хто мае патрэбу».

Па словах Аляксея Пікуса, нашэсце цыклону «Улі» паказала, наколькі сёння моладзь комплексна падыходзіць да вырашэння праблем. «Шчыра скажу: моладзь дапамагала па ўсім фронце работ, пачынаючы ад адраснай дапамогі, перш за ўсё пажылым людзям і ветэранам і заканчваючы дапамогай камунальным службам. Гаворка не проста аб расчыстцы снегу, а аб дастаўцы медыкаментаў і прадуктаў. І мы працягваем займацца добрымі справамі».

Моцныя маразы — пара гарачая

Раніца ў сераду, калі слупок тэрмометра замёр на адзнацы −20, для актыву пярвічнай арганізацыі БРСМ Беларускага дзяржаўнага педагагічнага ўніверсітэта — час папрацаваць. Дзяўчаты і хлопцы прыхапілі лапаты, добры настрой і адправіліся ў Маскоўскі раён сталіцы чысціць снег. Адпачываць няма калі, бо днямі зноў абяцаюць моцныя снегапады.

На вуліцы Слабадская, 3, дзе менавіта і сабралася моладзь, пазнаёміліся з валанцёрам Арынай ГОЛЕЦ. «Я ўпершыню ўдзельнічаю ў акцыі „Снежны дэсант“, — падзялілася дзяўчына. — Але ў нашым універсітэце многія маладыя людзі падключаліся да прыборкі снегу гэтай зімой, і я падумала: чаму б і не?! Тым больш пагадзіліся выйсці і сяброўкі, разам весялей».

Валанцёр Аляксандра ШЧЭРБА родам з Пухавіцкага раёна. Дзяўчына расказала, што выйшла змагацца з наступствамі снегападаў і моцных маразоў як прадстаўнік актыву БРСМ ад ВНУ, дзе вучыцца, у буднія дні, а ў выхадныя абавязкова ездзіць дадому, дзе таксама дапамагае сям’і і блізкім, якія жывуць у вёсцы. «А хто, калі не моладзь? — задаецца пытаннем дзяўчына. — Вядома, калі будзе патрэбна дапамога, мы зноў возьмем лапаты ў рукі і пойдзем чысціць снег».

Валанцёр Ксенія БАШКЕВІЧ, па нашых уражаннях, валодае выдатнымі лідарскімі якасцямі. Дзяўчына з аптымізмам узялася за працу, як толькі прыехалі на неабходнае месца, а яшчэ і каманду актывістаў падбадзёрвала. «Нам трэба пачысціць снег і прыбраць лёд каля пад’ездаў, — расказала пра свае задачы на найбліжэйшы час яна. — Для мяне дапамога людзям — гэта аснова. Ведаючы, што Беларускі рэспубліканскі саюз моладзі вельмі шмат удзельнічае ў мерапрыемствах, дзе патрэбны валанцёры, я папоўніла яго шэрагі яшчэ ў школе. Калі паступіла ва ўніверсітэт, вядома, працягнула дапамагаць людзям. Зіма і маразы правяраюць нас на трываласць. Але мы справімся!»

Гарачыя лініі працягваюць працаваць!

У прэс-службе Мінскага гарадскога камітэта БРСМ паведамілі, што валанцёры ініцыятывы «Снежны дэсант» прымаюць заяўкі па прыборцы снегу пажылым мінчанам, маламабільным грамадзянам, якія пражываюць у прыватным сектары. Акрамя гэтага, валанцёры гатовыя аказаць дапамогу ў колцы і складзіраванні дроў.

Пакінуць заяўку можна ў буднія дні з 9.00 да 18.00 па тэлефонах:

• Заводскі раён — 8 (017) 343-54-57,

• Ленінскі — 8 (017) 395-91-07,

• Маскоўскі — 8 (017) 258-33-30,

• Кастрычніцкі — 8 (017) 276-10-06,

• Партызанскі — 8 (017) 294-33-23,

• Першамайскі — 8 (017) 326-77-30,

• Савецкі — 8 (017) 377-96-22,

• Фрунзенскі — 8 (017) 338-20-91,

• Цэнтральны — 8 (017) 377-28-48,

Мінскі гаркам БРСМ — 8 (017) 379-85-54.

У выхадныя дні гарачыя лініі раённых камітэтаў БРСМ працуюць у анлайн-рэжыме. Звярнуцца па валанцёрскую дапамогу ў рамках акцыі можна таксама ў чаце тэлеграм-канала «Мінск БРСМ».

Яна ВАЛАСАЧ
Фота Лізаветы ГОЛАД