Андрэй Садоўскі адзначыў, што кожны жыхар Мінска бачыць, што ў горадзе праводзіцца мноства мерапрыемстваў па добраўпарадкаванні. «У верасні адкрылі 100-ю зону адпачынку. Штогод у кожным раёне па дзве такія зоны адкрываюцца. Пры выбары месцаў акцэнтуецца ўвага на тым, каб недалёка былі жылыя масівы, каб гэтыя месцы сталі новым пунктам прыцягнення жыхароў для адпачынку. Таксама працягваюцца мерапрыемствы па добраўпарадкаванні тэрыторыі ўздоўж Сляпянскай воднай сістэмы. Ужо да канца года там з’явіцца новая веладарожка, якая можа скласці канкурэнцыю цяпер існуючай галоўнай мінскай веладарожцы. Яна будзе працягласцю парадку 17 км», — расказаў ён. 

У сталіцы налічваецца каля 4,5 тыс. дваровых тэрыторый, якія патрабуюць абслугоўвання і арганізацыі работ у сферы ЖКГ. «У гэтым годзе былі запланаваны мерапрыемствы па добраўпарадкаванні 886 двароў, з іх 224 прадугледжвалі комплексны падыход. Комплексны падыход прымяняецца ў тым ліку і ў краіне. У Мінску такія двары вызначаюцца зыходзячы з таго, што дамы на такіх тэрыторыях ужо павінны былі прайсці капітальны рамонт. Таму пры выбары тэрыторый акцэнтуем увагу на тым, каб завяршыць работы і ў бліжэйшы час дадатковыя мерапрыемствы там не праводзіць», — адзначыў спікер.

Як правіла, комплекснае добраўпарадкаванне мае на ўвазе выкананне не менш за пяць відаў работ: рамонт дваровых праездаў і пешаходных сувязяў, замена дзіцячага і гульнявога абсталявання, абнаўленне малых архітэктурных формаў, пасадка зялёных насаджэнняў і аднаўленне газонаў. На сёння добраўпарадкаванне выканана ў 888 дварах, з іх комплексна — у 222.

Адным з найважнейшых мерапрыемстваў з’яўляецца рамонт дваровых праездаў, які складае каля 80% ад агульнай структуры работ, звярнуў увагу Андрэй Садоўскі. Пры значных пашкоджаннях пакрыцця выконваецца яго поўная замена. Так, рамонт асфальтабетоннага пакрыцця на дваровых праездах выкананы на плошчы каля 507 тыс. кв. м, што складае 107% ад плана.

Значная ўвага нададзена абнаўленню інфраструктуры дзіцячых і спартыўных пляцовак. «У гэтым годзе заменена практычна 2,8 тыс. адзінак дзіцячага гульнявога абсталявання. У параўнанні з 2023-м, паказчык павялічаны практычна ў два разы. Таксама заменена 184 адзінкі спартыўнага абсталявання. Усе новыя аб’екты сертыфікаваны і адпавядаюць патрабаванням бяспекі», — падкрэсліў намеснік начальніка ўпраўлення — начальнік аддзела энергетыкі упраўлення гарадской гаспадаркі і энергетыкі.

Працягваецца работа па мадэрнізацыі сістэм збору адходаў: у парку канструкцый папаўненне склала 794 адзінкі сучасных модульных кантэйнераў закрытага тыпу, якія перашкаджаюць распаўсюджванню смецця на прылеглай тэрыторыі.