Участковы інспектар аддзела аховы правапарадку і прафілактыкі Савецкага РУУС Мінска Ігар Гур’еў правёў прыём грамадзян у грамадскім пункце аховы правапарадку № 703. Жыхары прыходзілі з рознымі пытаннямі, але ўсіх аб’ядноўвала адно: яны давяраюць свайму ўчастковаму і ведаюць, што да яго можна звярнуцца з любой праблемай.
Першай на прыём прыйшла Любоў Георгіеўна. Яе турбаваў сусед, які выгульвае сабаку пад вокнамі яе кватэры на першым паверсе.
«Сабака брэша гучна, гуляе без намордніка, а часам і без павадка, — падзялілася жанчына. — У мяне маленькія ўнукі, і мне страшна выпускаць іх на вуліцу: раптам жывёла напалохае або ўкусіць».
Ігар Гур’еў уважліва выслухаў і растлумачыў: выпас сабак павінен праходзіць у спецыяльна адведзеных месцах, а буйных жывёл — толькі на кароткім павадку і ў намордніку. Выключэнні — шчанюкі да трох месяцаў і дэкаратыўныя пароды ростам да 25 сантыметраў у карку.
«Ваша пытанне я бяру на кантроль, — паабяцаў участковы. — Правяду з гаспадаром прафілактычную гутарку. Пры паўторных парушэннях будзе складзены адміністрацыйны пратакол».
Наступным на прыём прыйшоў Антон Іванавіч. Яго бацька раней захапляўся паляваннем, але стрэльба даўно не выкарыстоўваецца і захоўваецца ў сейфе. Мужчына хацеў даведацца, ці можна ў сувязі з непатрэбнасцю здаць зброю ў міліцыю.
«Асобы, якія добраахвотна здаюць зброю і боепрыпасы, якія незаконна захоўваюцца, вызваляюцца ад крымінальнай і адміністрацыйнай адказнасці, — растлумачыў Ігар Гур’ёў. — Гэта можна зрабіць у любы час у аддзеле ўнутраных спраў па месцы жыхарства або па тэлефоне 102».
Апошнім на прыём прыйшоў унук пажылой жыхаркі Савецкага раёна. Некалькі разоў бабулі тэлефанавалі нібыта ад дамафоннай службы, сотавага аператара і іншых арганізацый, патрабуючы назваць пашпартныя дадзеныя ці коды са смс.
Праваахоўнік распавёў і пра рэальны выпадак: 90-гадовую мінчанку падманулі ашуканцы, выманіўшы пашпартныя дадзеныя пад выглядам замены лічыльнікаў, а затым — пад маркай «выратавання» грошай, пераканалі перадаць кур’еру каля 22 000 рублёў. Ссама кур’ерка аказалася ахвярай — 78-гадовая жанчына з Мінскай вобласці, якая пад ціскам злачынцаў пазбавілася і чужых, і сваіх 3300 рублёў.
«Ніколі не перадавайце асабістыя даныя па тэлефоне, — нагадаў участковы. — Ні банк, ні міліцыя, ні камунальныя службы не тэлефануюць з просьбамі назваць коды, пашпартныя дадзеныя або аддаць грошы. Калі званок выклікае сумненні, кладзіце трубку і паведамляйце нам».
На развітанне Ігар Гур’ёў уручыў маладому чалавеку прафілактычную ўлётку з правіламі паводзін пры падазроных званках. Той падзякаваў і паабяцаў абавязкова перадаць яе бабулі.
Такія прыёмы — не проста фармальнасць. Гэта жывыя зносіны, дзе кожны можа атрымаць падтрымку, абарону і адказ. І тое, што людзі ідуць да ўчастковага з самымі рознымі пытаннямі, — найлепшы доказ даверу да міліцыі.
Вераніка КАНЮТА
Фота прэс-службы Савецкага РУУС
