Жыхарка Барысава Аліна Пятроўна прыйшла на прыём з жыллёвым пытаннем. Яна расказала, што цягам апошніх двух гадоў рассялілі два суседнія дамы, а іхні — не. «Наш дом двухкватэрны, неўладкаваны, але яго не рассяляюць. Я там жыву з сям’ёй. Сусед не жыве», — адзначыла заяўніца.

Старшыня Барысаўскага райвыканкама Мікалай Карповіч патлумачыў, што гэта прыватная ўласнасць. Наталля Качанава ўважліва выслухала барысаўчанку і з ходу даручыла Барысаўскаму райвыканкаму і Мінскаму аблвыканкаму дадаткова вывучыць пытанне.

Крысціна Андрэеўна — шматдзетная маці. Пасля разводу з першым мужам яна жыла ў прыватным доме бацькоў, дзе была зарэгістраваная. Цяпер выйшла замуж у другі раз, стала шматдзетнай. «Але нас не ставяць на ўлік тых, хто мае патрэбу, бо я пагоршыла жыллёвыя ўмовы, пераехаўшы жыць да свёкра ў двухпакаёвую кватэру, — разводзіць рукамі жанчына. — У бацькоў вялікі дом. З-за гэтага я не магу скарыстацца льготамі на паляпшэнне жыллёвых умоў, як шматдзетная сям’я». 

Кіраўнік справамі Мінскага аблвыканкама Таццяна Шаўцова патлумачыла, што заяўнік станавілася на чаргу як маладая сям’я, і тады квадратныя метры не ўлічваліся. У другім шлюбе статус маладой сям’і быў страчаны. Па прапісцы было больш за 15 квадратаў на чалавека. А калі заяўніца зарэгістравалася па іншым адрасе, у кватэру з меншай плошчай, такім чынам, пагоршыла ўмовы.

«Сям’я шматдзетная! Трэба паляпшаць умовы і дапамагчы стаць на чаргу», — адзначыла Наталля Качанава. Шматдзетнай маме прапанавалі пакуль разгледзець арэнднае жыллё. Старшыня Савета Рэспублікі дала неабходныя даручэнні старшыні Барысаўскага райвыканкама.

Жыхарка Барысава Алена Віктараўна звярнулася з просьбай аб пераглядзе пенсіі. Паводле слоў пенсіянеркі, памер выплат не адпавядае яе 35-гадоваму стажу работы: «Я ў 2016 годзе пайшла на пенсію. Не змагла сабраць усе дакументы аб пацверджанні стажу і заработнай плаце. Дакументы давозіла ўжо пазней. І ўлічылі не ўсе». 

Старшыня Савета Рэспублікі звязалася з намеснікам міністра працы і сацыяльнай абароны Валерыем Кавальковым. Ён удакладніў, што барысаўчанка атрымлівае звычайную пенсію па ўзросце. Таксама дадаў, што ў жанчыны быў стаж работы ў Латвіі. Туды таксама ведамствам быў зроблены запыт, у якім адмовілі. «Але нават калі б адказ атрымалі, пенсія значна б не змянілася. Стаж работы ў Латвіі быў менш за год. Зарплата ў заяўніцы была невялікая, таму і атрымаўся нізкі каэфіцыент пенсіі», — патлумачыў Валерый Кавалькоў.

Алена Віктараўна падала яшчэ дакументы, якія пацвярджаюць стаж работы ў іншых арганізацыях. Наталля Качанава даручыла больш уважліва разабрацца і вывучыць пытанне барысаўчанкі.

З пытаннем аб падтапленні зямельнага ўчастка звярнулася жыхарка мікрараёна Дымкі горада Барысава Галіна Уладзіміраўна. Яна расказала, што насупраць яе дома на дарозе кожны год утвараецца глыбокая яма і дом пастаянна затапляе. «Цяпер адбыўся абвал, тырчаць металічныя апалубкі. Пражываем у аварыйных умовах», — наракае жанчына.

Старшыня Барысаўскага райвыканкама растлумачыў, што на гэтай вуліцы ажыццяўляюць пастаяннае грэйдзіраванне дарогі. «Трэба зрабіць гэтую вуліцу. Вы самі гэта разумееце. Трэба вырашыць пытанне з падтапленнем раз і назаўжды. Трэба зрабіць якасна, а не выкідваць грошы на грэйдзіраванне», — падкрэсліла спікер Савета Рэспублікі. 

***

Журналістам Наталля Качанава расказала: «Кожны раз паступаюць розныя пытанні, і я б нават не рабіла акцэнт на чымсьці канкрэтным. Калі раней мы рабілі акцэнт на жыллёва-камунальнай гаспадарцы, то цяпер такога няма. Як правіла, людзі звяртаюцца абсалютна па розных пытаннях. І вельмі шмат пытанняў асабістых, якія датычацца ўнутрысямейных праблем, тады, калі людзі дзеляць нейкую маёмасць пры разводзе, калі вырашаюцца пытанні іх дзяцей». 

Падводзячы прамежкавыя вынікі прыёму грамадзян, спікер Савета Рэспублікі адзначыла тыя звароты, якія датычацца сістэмы адукацыі:

«Мне здаецца, што цяпер мы больш уважліва павінны звяртаць увагу на выхаванне дзяцей у школах, у дзіцячых дашкольных установах. У дзіцяці павінна фармавацца пачуццё справядлівасці, яно павінна адчуваць, што ёсць справядлівасць. Дзеці вельмі хваравіта ставяцца да несправядлівасці ў адносінах паміж дзецьмі, паміж педагогам і вучнем. Гэта тое, пра што заўсёды гаворыць Прэзідэнт нашай краіны, калі сустракаецца з педагогамі на педагагічных канферэнцыях, на нарадах. Школа павінна не толькі вучыць. Школа павінна выхоўваць. Гэта вельмі важна».

Паводле слоў Наталлі Качанавай, не менш важна, каб педагогі, якія працуюць у школах, а таксама выхавальнікі ў дзіцячых дашкольных установах, былі яшчэ і псіхолагамі: «Таму што разумець і своечасова дапамагчы дзіцяці — гэта вельмі важна. На жаль, такія звароты сталі больш часта сустракацца на прыёмах па асабістых пытаннях». 

Падчас прыёму грамадзян было пачута шмат слоў падзякі ў адрас кіраўніка дзяржавы і вертыкалі ўлады ў цэлым. «Гэта сведчыць у цэлым аб рабоце ўлады ў нашай краіне. Мы гэтыя падзякі чуем, калі сустракаемся з людзьмі ў калектывах, арганізацыях, установах. Людзі дзякуюць за тую палітыку, якая праводзіцца ў нашай краіне. Ну а калі людзі прыходзяць на прыёмы, часта гучаць словы ўдзячнасці за стаўленне ў вырашэнні таго ці іншага пытання. Гэта сведчыць пра тое, як працуюць мясцовыя органы ўлады і наогул вертыкаль у цэлым у нашай краіне. У нас выбудаваная сістэмная работа па зваротах грамадзян. Гэта значыць чалавек сёння мае права звярнуцца або на асабісты прыём, або на прамую тэлефонную лінію. Прыёмы па асабістых пытаннях праводзяць рэспубліканскія органы кіравання, мясцовыя органы ўлады, кіраўнікі прадпрыемстваў і арганізацый, дэпутаты ўсіх узроўняў, члены Савета Рэспублікі. Мне здаецца, няма нават такога дня, каб хтосьці не праводзіў прыём па асабістых пытаннях. Ну а рашэнне напрамую залежыць ад таго, з якім пытаннем звярнуліся. І, вядома, ад таго, хто праводзіць прыём і далей трымае на кантролі да поўнага вырашэння гэтае пытанне». 

• Усе праблемы, агучаныя падчас прыёму грамадзян, даручана ўзяць на кантроль і знайсці спосабы іх вырашэння.

Данііл ХМЯЛЬНІЦКІ, фота БелТА, г. Барысаў.

У адзіны дзень прыёму члены Савета Рэспублікі працавалі ўчора ва ўсіх раёнах Мінскай вобласці. З чым прыходзілі людзі на прыём да сенатараў, раскажам падрабязна ў дадатку «Мясцовае самакіраванне».