«У III квартале на рынку Мінска сфарміравалася наступная сітуацыя: у месяц рэгістравалася ў сярэднім 1150 здзелак — гэта адпавядае сярэднямесячнай колькасці, пачынаючы з сакавіка, а кошт квадратнага метра працягнуў плаўна павышацца, — растлумачылі спецыялісты. — Зарэгістравана 3417 здзелак з кватэрамі, што адпавядае ўзроўню папярэдняга квартала. У верасні здзейснена 1125 здзелак, што блізка да сярэднямесячнага значэння года: з сакавіка яно складае каля 1150 здзелак у месяц. Найбольшая колькасць здзелак з кватэрамі здзейснена ў дамах, пабудаваных пасля 2020 года, — 29% ад агульнай колькасці. Колькасць здзелак з кватэрамі ў старым жылым фондзе прыкметна знізілася ў параўнанні з II кварталам: у дамах да 1960 года пабудовы — на 23%, у дамах 1960–1970 і 1970–1980 гадоў — на 10% у кожным дыяпазоне».

У III квартале пакупнікі заплацілі сумарна 1,24 млрд рублёў ($417,4 млн у эквіваленце) за 172,8 тыс. кв. м кватэр. У структуры першаснага і другаснага рынкаў традыцыйна пераважаюць аднапакаёвыя кватэры. Доля здзелак на першасным рынку ў III квартале — 9%.

У параўнанні з II кварталам цэны выраслі на 10–12% у рублях і на 4–6% у доларах: аднапакаёвыя — 7470 рублёў за кв. м ($2520 за кв. м), двухпакаёвыя — 6640 рублёў за кв. м ($2240 за кв. м), трохпакаёвыя — 6050 рублёў за кв. м ($2040 за кв. м).

Больш за ўсё здзелак у III квартале здзейснена ў Кастрычніцкім раёне Мінска, дзе размешчаны ЖК «Мінск-Свет» («Minsk World») — 732. У найменш актыўным Партызанскім раёне Мінска здзейснена 126 здзелак. Самай дарагой і па агульнай цане, і па цане квадратнага метра стала здзелка з кватэрай плошчай 168 кв. м, размешчанай на вул. Грыбаедава, 21. Сума здзелкі — 3,47 млн рублёў (20,64 тыс. рублёў за кв. м), або $1,2 млн ($7,16 тыс. за кв. м) у эквіваленце.

У III квартале прададзена 23 кватэры коштам звыш 1 млн рублёў (на 10 больш, чым у папярэднім квартале). Самая вялікая з іх — 445,2 кв. м на вул. Чэхава, а самая кампактная — 58 кв. м.

«За першыя 20 дзён кастрычніка зарэгістравана менш за 500 здзелак — каля 40% вераснёўскага аб’ёму. Гэта можа паказваць на першыя прыкметы астуджэння попыту пры бягучым узроўні цэн, — звярнулі ўвагу спецыялісты. — На рынак адначасова ўплывае мноства фактараў: умовы крэдытавання, аб’ём прапановы, дынаміка курсу нацыянальнай валюты і традыцыйная сезоннасць рынку. Таму далейшая дынаміка цэн будзе вызначацца перш за ўсё суадносінамі попыту і прапановы, рэакцыяй пакупнікоў на бягучы ўзровень цэн і інтэнсіўнасцю выхаду на рынак адкладзенай прапановы. Калі ж прапанова не вырасце, а пакупніцкая здольнасць насельніцтва працягне зніжацца на фоне ўстойлівага росту цэн, рынак можа перайсці ў фазу стабілізацыі».