Дзелавы падыход да справы, працоўны запал, поўная самааддача характэрныя для ўсіх работнікаў новалукомскага прыватнага вытворча-гандлёвага ўнітарнага прадпрыемства «ПрамКамплектЦэнтр». Ганаровае званне «Чалавек года Віцебшчыны» сёлета прысвоена намесніку дырэктара кампаніі па камерцыйных пытаннях Аляксею Мандрыку.

Калектыў, адным з кіраўнікоў якога ён з’яўляецца, невялікі (крыху больш за 40 чалавек), амаль цалкам мужчынскі: слесары, зваршчыкі, мантажнікі. Усе яны пераважна вясковыя хлопцы, якія не баяцца бруднай і цяжкай работы, што даводзіцца выконваць менавіта рукамі. Вярнуўшыся пасля вучобы ці службы ў войску дадому, яны засталіся на радзіме, з бацькамі і блізкімі.

Сярэдні ўзрост работнікаў — 35 гадоў. Самы час ствараць, праяўляць грамадзянскую сталасць, дапамагаць развіццю сваіх мясцін. Таму работнікі прыватнага прадпрыемства з ахвотай удзельнічаюць у мясцовых сацыяльных праграмах, суботніках.

— Наша асноўная вытворчая база знаходзіцца ў аграгарадку Лукомль, — згадвае Аляксей Мандрык. — Таму грэх было не зрабіць свой унёсак у рэканструкцыю будынка былога сельсавета пад праваслаўны храм. Удзельнічаем у добраўпарадкаванні іншых населеных пунктаў. Летась мы падарылі мабільны сцэнічны комплекс райцэнтру Чашнікі.

Да таго, як заняць пасаду намесніка дырэктара, Аляксей скончыў вучылішча, затым — каледж і нарэшце — універсітэт, паспытаў рознага хлеба: працаваў у будаўніцтве, ездзіў на заробкі ў Расію. Кар’еру на «ПрамКамплектЦэнтры» пачынаў слесарам. Цяпер для яго не ў навізну падарожжа ажно ў Кітай — яшчэ і для таго, каб пацікавіцца, а як там з вытворчасцю зборных сцэн, і потым задаволена паведаміць калектыву: наша — найлепшае!

Кампанія спецыялізуецца на вырабе мабільных сцэнічных подыумаў, комплексаў розных мадыфікацый і звязанага з гэтым абсталявання. У кожным беларускім раённым і абласным цэнтры, у сталіцы ўстаноўлены вулічныя зборныя сцэны, зробленыя ў Новалукомлі.

Сёння вытворчыя плошчы ПВГУП «ПрамКамплектЦэнтр» займаюць 2,5 тысячы квадратных метраў, а пачыналі 17 гадоў таму на 60 «квадратах».

На такім пятачку выпусціць абсталяванне для вялізнай сцэны культурна-спартыўнай установы «Чыжоўка-арэна» тады ўдалося дзякуючы натхнёнасці, гарачаму жаданню ствараць новую патрэбную і якасную прадукцыю. Сур’ёзная заяўка аб сабе дазволіла ўмацаваць рэпутацыю, атрымліваць больш і больш заказаў. Цяпер да яго стаяць чэргі.

— Мы гарантуем якасць сваёй складанай інжынернай прадукцыі. Выдатна разумеем, што побач са сцэнай знаходзіцца вялізная колькасць людзей, — запэўнівае Аляксей Мандрык. — Сярэдняя вага такога перасоўнага комплексу набліжаецца да трох тон, ён можа вытрымаць столькі ж навяснога гукавога, светлавога абсталявання, аздаблення сцэны.

 Прадукцыя «ПрамКамплектЦэнтра» прыйшлася да месца ў Нацыянальным выставачным цэнтры «БелЭкспа», Рэспубліканскім цэнтры алімпійскай падрыхтоўкі «Стайкі», шматпрофільным культурна-спартыўным комплексе «Мінск-арэна», тэлестудыях.

Больш за 60% вырабаў майстры з Новалукомля экспартуюць за межы краіны, пераважна ў Расію. Геаграфія — ад Масквы і Санкт-Пецярбурга да Далёкага Усходу. Акрамя таго, зборнае сцэнічнае абсталяванне «гастралюе» з папулярнымі выканаўцамі.

Падставай для гонару з’яўляецца тое, што сцэнічныя канструкцыі, вырабленыя на іх прадпрыемстве, збіраюцца за лічаныя гадзіны ўручную, без выкарыстання спецыяльнай тэхнікі. І тым, што, нягледзячы на вялікія габарыты, усе дэталі выкананы надзвычай акуратна і дакладна.

  За 2024-ы прадпрыемства выпусціла абсталявання на 11,7 мільёна рублёў, у тым ліку на 7,1 мільёна — на экспарт.

Святлана ЯКАЎЛЕВА, фота аўтара.