Аб рабоце арганізацый спажывецкай кааперацыі расказала намеснік старшыні праўлення Белкаапсаюза Аксана СКІНДЭР.

Выгадна для ўсіх

Работа з насельніцтвам пачынаецца ўжо ў перыяд з’яўлення ранняй агародніны, напрыклад, цяплічных агуркоў і таматаў на Століншчыне, садовых суніц у Лунінецкім і Маларыцкім раёнах. Для закупак сельскагаспадарчай прадукцыі і сыравіны Белкаапсаюз стварыў маштабную прыёманарыхтоўчую сетку, якая ўключае звыш 790 пунктаў і ахоплівае ўсю краіну. На 103 рынках Беларусі жыхарам і вытворцам прадукцыі выдзелена больш за шэсць тысяч гандлёвых месцаў для яе самастойнага продажу.

— Нарыхтоўчая дзейнасць — першакрыніца сыравіны, якая паступае на перапрацоўчыя прадпрыемствы. Яна дазваляе таксама забяспечыць рознічную гандлёвую сетку шырокім асартыментам ранняй агародніны, ягад, — адзначыла Аксана Скіндэр.

Да нарыхтовак падключаюцца і рознічныя магазіны — іх больш за 2,6 тысячы. І ўся гэтая праца дае свой плён.

— За студзень — чэрвень мы закупілі ў насельніцтва і сельгасвытворцаў прадукцыі на суму больш за 200 мільёнаў рублёў. Нарыхтоўчы абарот (без уліку другаснай сыравіны) склаў 140,5 мільёна — на 14 працэнтаў больш за аналагічны перыяд мінулага года, — падзялілася статыстыкай намеснік старшыні праўлення Белкаапсаюза. — Сельскім жыхарам за здадзеныя лішкі сельскагаспадарчай і дзікарослай прадукцыі ў бягучым годзе ўжо выплачана 78,2 мільёна рублёў.

Якасная, смачная, экалагічна чыстая

Да таго ж за паўгода было закуплена 6 тысяч тон бульбы, 11 тысяч тон агародніны, больш за 4,5 тысячы тон садавіны і ягад. Па традыцыі больш за ўсіх сельскагаспадарчую прадукцыю здаюць жыхары Брэсцкай вобласці — і клімат, і стаўленне людзей да зямлі там асаблівыя, канстатуе Аксана Скіндэр. Сярод лідараў у гэтым рэгіёне — Маларыта, Лунінец, Іванава, Івацэвічы. Дарэчы, летась толькі ў Брэсцкай вобласці Белкаапсаюз закупіў больш за 20 тон салодкай кукурузы — прадукт канкурэнтаздольны, не саступае па сваёй якасці імпартнаму і таму карыстаецца вялікай папулярнасцю ў пакупнікоў.

А вось па дзікаросах наперадзе Магілёўская вобласць: Глускі, Асіповіцкі раёны славяцца сваімі лясамі, у якіх мясцовыя жыхары штогод збіраюць шмат ягад і грыбоў, — якасных, смачных і экалагічна чыстых.

— Магу з упэўненасцю сказаць: уся ягада, якую мы рэалізуем унутры краіны і адпраўляем на перапрацоўку, экалагічна чыстая. Узровень бекерэляў у нас амаль удвая ніжэйшы за еўрапейскія нормы, — падкрэсліла Аксана Скіндэр.

І ў свежым, і ў перапрацаваным выглядзе

Як паведаміла намеснік старшыні праўлення Белкаапсаюза, ужо закуплена звыш 320 тон садовых суніц, з якіх больш за 70 працэнтаў — таварная ягада, рэалізаваная ў рознічнай сетцы і на рынках спажывецкай кааперацыі. Чарніц закуплена больш за 90 тон, агуркоў — 2,8 тысячы тон, таматаў — звыш 1,7 тысячы тон, костачкавых пладоў — больш за 100 тон, парэчак — звыш 50 тон, культываваных буякоў — больш за 30 тон. Грыбоў нарыхтавана і рэалізавана звыш дзевяці тон — яны паступаюць у свежым выглядзе на рынкі Мінска і абласных цэнтраў.

— Сярэднегадавы аб’ём закупак яблыка-ападу нашай сістэмай у апошнія гады, нават з улікам неўраджайнага мінулага сезона, складае больш за 40 тысяч тон. Сёлета мы ўжо правялі дагаворную работу з перапрацоўчымі прадпрыемствамі ўсіх форм уласнасці, — сказала Аксана Скіндэр. — На сённяшні дзень заключаны дагаворы з 37 прадпрыемствамі краіны на перапрацоўку яблыкаў. Аб’ёмы закупак ужо пацверджаны па папярэдняй дамоўленасці: перапрацоўшчыкі гатовы набыць у арганізацый спажывецкай кааперацыі звыш 65 тысяч тон яблыкаў для перапрацоўкі.

Стартавая цана на нарыхтоўку яблыка-ападу ў насельніцтва — 15–20 капеек за кілаграм. Дарэчы, з асноўнымі патрабаваннямі да здачы ўсіх відаў прадукцыі можна азнаёміцца ??на сайце Белкаапсаюза.

Аміна НАЗАРАВА
Фота БелТА