За апошнія 24 гадзіны ў міліцыю паступіла каля 400 паведамленняў аб званках тэлефонных аферыстаў. Таксама зарэгістравана 33 злачынствы, учыненыя з выкарыстаннем інфармацыйна-камунікацыйных тэхналогій.

Аддзел арганізацыі апрацоўкі ашуканскіх аперацый МУС ініцыіраваў блакіраванне трох фішынгавых інтэрнэт-рэсурсаў. Таксама праваахоўнікі заблакіравалі плацяжы ў адрас 12 замежных рэквізітаў, якія выкарыстоўваюцца зламыснікамі, і прыпынілі расходныя аперацыі па 26 рахунках.

Часцей за ўсё аферысты падманваюць пры куплі тавараў у інтэрнэце. Далей па спосабе здзяйснення злачынстваў ідуць крадзяжы праз сацсеткі і званкі ад імя службовых асоб (вішынг).

МУС нагадвае: прапановы хуткага заробку або куплі тавараў па моцна зніжанай цане ў інтэрнэце звязаныя з рызыкай страціць грошы. Пры зносінах з аферыстамі па тэлефоне трэба спыніць размову і паведаміць у міліцыю па нумары 102.