Чарговы выпадак крадзяжу ў цягніку закончыўся судом і штрафам для злодзея. У чэрвені гэтага года ў цягніку «Віцебск—Мінск» адна з пасажырак, выходзячы на канцавым у Мінску, забылася свой смартфон маркі POCO на століку ў вагоне. Пра гэта паведаміла «Мінская праўда».
Гэтым скарыстаўся 23-гадовы жыхар Віцебска, які знаходзіўся ў тым жа вагоне, — ён проста забраў чужы тэлефон, коштам 2375 рублёў.
Праваахоўнікі хутка ўстанавілі асобу маладога чалавека і распачалі супраць яго крымінальную справу паводле артыкула аб крадзяжы. Выкрадзены тэлефон быў знойдзены і вернуты законнай уладальніцы.
У судзе віцябчанін цалкам прызнаў сваю віну і раскаяўся. Суд Кастрычніцкага раёна Мінска прызначыў яму пакаранне ў выглядзе штрафу ў памеры 50 базавых велічынь, што склала 2100 рублёў. Пра гэта расказалі ў транспартнай пракуратуры.
