У фінале ў мужчынскай адзіночцы Залатой паказаў другі рэзультат (6 мін. 48,16 сек.), уступіўшы менш за дзве секунды алімпійскаму чэмпіёну Парыжа немцу Оліверу Цайдлеру. Топ-3 замкнуў амерыканец Сэмюэл Мелвін (06:49,44). Месяц таму на першым этапе Кубка свету ў Іспаніі Яўген таксама быў другім. Раней на канале ў Люцэрне Залатой атрымаў перамогі ў папярэднім, чвэрцьфінальным і паўфінальным заездах.

Усяго 28 чэрвеня беларусы прэтэндавалі на медалі ў трох відах праграмы. Максім Грыбоўскі, Фёдар Шорах, Раман Шабацька і Павел Сіненка занялі чацвёртае месца ў мужчынскай чацвёрцы парнай, да бронзавых прызёраў з Германіі не хапіла ўсяго 0,23 сек. На двух верхніх радках размясціліся брытанскі і галандскі квартэты.

У мужчынскай васьмёрцы беларускі экіпаж у складзе Сяргея Валадзько, Дзмітрыя Фурмана, Антона Купалава, Дзяніса Клімяты, Міхаіла Іванчыкава, Аляксея Бандзюка, Уладзіслава Локуна, Дзяніса Кучарава і рулявой Валерыі Цяляк фінішаваў пятым. Тройку прызёраў склалі лодкі з Нідэрландаў, Вялікабрытаніі і Аўстраліі.

У жаночай двойцы парнай нашы Аляксандра Галубянкова і Вераніка Анацка спыніліся на стадыі паўфіналу. Беларускія спартсмены прадаўжаюць падрыхтоўку да кантынентальнага форуму, які з 31 ліпеня па 2 жніўня прыме Італія. Галоўны старт сезона ў акадэмічным веславанні — чэмпіянат свету — пройдзе ў Нідэрландах з 24 па 30 жніўня.