У час міністэрскай сустрэчы краін — членаў АДКБ абмяркоўваліся пытанні ўзаемадзеяння ў кантэксце падрыхтоўкі пасяджэння Савета калектыўнай бяспекі АДКБ, запланаванага на 11 лістапада 2026 года, а таксама перспектывы фарміравання архітэктуры роўнай і непадзельнай бяспекі ў Еўразіі.

Кіраўнік беларускага знешнепалітычнага ведамства прыцягнуў увагу да Еўразійскай хартыі разнастайнасці і шматпалярнасці ў XXI стагоддзі, перагаворы па якой пройдуць 25 верасня на сустрэчы групы аднадумцаў у падтрымку краін з сярэднім узроўнем даходу.

Максім Рыжанкоў праінфармаваў калег аб прыярытэтах беларускай дэлегацыі на 81-й сесіі Генеральнай Асамблеі ААН. Па выніках сустрэчы дасягнута дамоўленасць аб каардынацыі дзеянняў дзяржаў — членаў АДКБ у час бягучай сесіі.

На нарадзе высокага ўзроўню па пытаннях прыняцця мер у сувязі са змяненнем клімату і справядлівага пераходу да чыстай энергіі міністр назваў асноўныя прычыны, якія перашкаджаюць эфектыўнаму вырашэнню кліматычных выклікаў. Асаблівую ўвагу ён удзяліў незаконным аднабаковым прымусовым мерам, якія ўскладняюць для многіх дзяржаў доступ да чыстых тэхналогій і аднаўляльных крыніц энергіі. Максім Рыжанкоў падкрэсліў, што байкот паветранай прасторы Беларусі і Расіі наўмысна падаўжае маршруты і шматразова павялічвае вугляродны след. У гэтым кантэксце кіраўнік беларускага знешнепалітычнага ведамства звярнуў увагу на маніпуляцыі Захаду зялёным парадкам дня і заклікаў адмовіцца ад двайных стандартаў і палітызацыі прыродаахоўнай тэматыкі, а таксама выступіў за сумесную работу па пераадоленні кліматычнага крызісу.

На пасяджэнні, прысвечаным 40-й гадавіне прыняцця Дэкларацыі ААН аб праве на развіццё, кіраўнік МЗС Беларусі абазначыў асноўныя сістэмныя перашкоды, з якімі сутыкаецца сусветная супольнасць і якія не дазваляюць набліжацца да прыняцця міжнароднага пакта аб праве на развіццё. Сярод іх адзначаны спробы заходніх дзяржаў стрымліваць развіццё краін глабальнай большасці праз незаконныя аднабаковыя прымусовыя меры, стварэнне штучных бар’ераў для гандлю і тэхналагічнага абмену, а таксама навязванне так званых дэмакратычных мадэлей і рэформ.

Міністр выступіў супраць палітыкі «права моцнага» і заклікаў да фарміравання новай архітэктуры міжнароднага эканамічнага супрацоўніцтва, арыентаванай на інтарэсы людзей, а не заходніх эліт. У якасці станоўчага прыкладу функцыянавання такіх механізмаў прыведзены такія рэгіянальныя аб’яднанні, як БРІКС і ШАС.

На палях Генеральнай Асамблеі ААН Максім Рыжанкоў таксама правёў некалькі двухбаковых перагавораў. Так, на сустрэчы з міністрам замежных спраў Ганы Самуэлем Акудзета Аблаква разгледжана рэалізацыя гандлёва-эканамічных праектаў, абазначаных лідарамі дзвюх краін у час афіцыйнага візіту ў Беларусь прэзідэнта Ганы Джона Драмані Махамы. Бакі адзначылі паспяховы вопыт узаемадзеяння ў сферы механізацыі сельскай гаспадаркі і выказалі зацікаўленасць у развіцці адпаведных праектаў.

Кіраўнікі знешнепалітычных ведамстваў разгледзелі пытанні харчовай бяспекі, уключаючы пастаўкі беларускіх прадуктаў харчавання і ўгнаенняў, а таксама пашырэнне сустрэчных паставак у Беларусь ганскай прадукцыі, у тым ліку какава-зярнят. Субяседнікі закранулі пытанні супрацоўніцтва ў адукацыйнай сферы і пацвердзілі гатоўнасць прадаўжаць узаемную падтрымку на міжнароднай арэне. Пры гэтым дыпламаты падкрэслілі важнасць аб’ектыўнай ацэнкі гістарычных наступстваў каланіяльнай палітыкі і дамовіліся прадоўжыць сумесныя намаганні ў гэтым напрамку.

На сустрэчы з міністрам замежных спраў Мальдыўскай Рэспублікі Іруцішам Адам пацверджана ўзаемная зацікаўленасць у пашырэнні супрацоўніцтва ў турыстычнай сферы. Дасягнута дамоўленасць аб актывізацыі супрацоўніцтва ў міжнародных арганізацыях па пытаннях, якія ўяўляюць узаемны інтарэс. Міністры выказалі гатоўнасць развіваць дагаворна-прававую базу, у тым ліку ў галіне паветраных зносін.

У ліку перспектыўных напрамкаў узаемадзеяння бакі выдзелілі адукацыю, падрыхтоўку кадраў для медыцынскай галіны, сфер турызму і рэкрэацыі, а таксама пастаўкі беларускай харчовай прадукцыі. Па выніках сустрэчы міністры падпісалі міжурадавае пагадненне аб узаемнай адмене віз.

На сустрэчы з прэзідэнтам Міжнароднага камітэта Чырвонага Крыжа Мір’янай Спалярыч-Эгер адзначана неабходнасць прамога і канструктыўнага дыялогу. Бакі абмяняліся думкамі аб магчымым укладзе гуманітарных структур у садзейнічанне ўрэгуляванню канфлікту ва Украіне і вырашэнню звязаных з ім гуманітарных пытанняў.

Значная ўвага была ўдзелена перспектывам пашырэння праграм Міжнароднага камітэта Чырвонага Крыжа ў Беларусі, уключаючы правядзенне спецыялізаваных трэнінгаў і брыфінгаў, абмен экспертным вопытам і аказанне тэхнічнага садзейнічання. Таксама абмеркавана магчымасць арганізацыі візіту кіраўніка МКЧК у Беларусь.

У цэнтры ўвагі перагавораў з міністрам замежных спраў Азербайджана Джэйхунам Байрамавым былі ключавыя напрамкі двухбаковага супрацоўніцтва. Максім Рыжанкоў і Джэйхун Байрамаў адзначылі высокую дынаміку палітычных кантактаў і каардынацыі паміж знешнепалітычнымі ведамствамі, у тым ліку па лініі міжнародных арганізацый. Разгледжаны перспектывы рэалізацыі сумесных гандлёва-эканамічных праектаў, у тым ліку паставак беларускай тэхнікі і прадуктаў харчавання, а таксама азербайджанскіх фруктаў, агародніны і арэхаў.

Па выніках сустрэчы Максім Рыжанкоў і Джэйхун Байрамаў падпісалі план супрацоўніцтва паміж міністэрствамі замежных спраў Беларусі і Азербайджана на 2027-2028 гады, а таксама мемарандум аб узаемаразуменні і супрацоўніцтве па консульскіх пытаннях.