Мінулы год стаў трыумфальным для кітайскай анімацыйнай індустрыі. Касавыя зборы анімацыйных фільмаў у Кітаі перавысілі 25 млрд юаняў, што склала амаль 50 % ад агульных касавых збораў краіны, перадае «Жэньмінь жыбаа» анлайн».
З дзесяці самых касавых карцін года чатыры пазіцыі занялі анімацыйныя стужкі, прычым тры з іх — кітайскай вытворчасці.
Галоўнай сенсацыяй мінулага года стаў мультфільм «Нэчжа перамагае Цара драконаў», які сабраў 15,95 млрд юаняў і стаў лідарам сусветнага пракату сярод анімацыйных фільмаў за ўсю гісторыю кінематографа. Гэта таксама першы азіяцкі фільм, які ўвайшоў у дзясятку самых касавых карцін свету, заняўшы пятае месца ў глабальным рэйтынгу. «Нэчжа перамагае Цара драконаў» паглядзелі 324 млн гледачоў, многія з якіх вярталіся ў кінатэатры паўторна. Па словах прэзідэнта студыі камп’ютарнай анімацыі Light Chaser Animation Юй Чжоу, поспех карціны прыцягнуў увагу да жанру ў цэлым і стымуляваў цікавасць публікі да іншых анімацыйных праектаў на працягу ўсяго года.
У 2011-2018 гадах анімацыя займала каля 10 % кітайскага кінарынку, у 2019-2024 гадах — каля 14 %, а летась гэты паказчык вырас да 50 %. Эксперты звязваюць такі рост са змяненнем аўдыторыі: маладое пакаленне, якое вырасла на мультфільмах, актыўна наведвае кінатэатры і ахвотна выбірае анімацыйны кантэнт.
Поспех кітайскай анімацыі можна растлумачыць некалькімі фактарамі. Па-першае, тэматыкі анімацыйных праектаў разнастайныя — ад традыцыйных міфаў да сучасных гісторый з сацыяльным падтэкстам. Па-другое, тэхналагічны ўзровень кітайскіх студый дасягнуў міжнародных стандартаў, што дае магчымасць ствараць высакаякасныя анімацыйныя фільмы. Акрамя таго, узмацненне культурнай упэўненасці і ўзрастаючая цікавасць да нацыянальнай спадчыны робяць айчынную анімацыю асабліва прывабнай для маладой аўдыторыі.
Немалаважную ролю адыгрывае развіццё франшызы і спадарожных прадуктаў. Большасць паспяховых карцін з’яўляюцца сіквелам або часткай медыяфраншызы, што дазваляе падтрымліваць устойлівую сувязь з аўдыторыяй і генерыраваць дадатковы даход.
Індустрыя таксама становіцца больш кансалідаванай: буйныя вытворчыя кампаніі фарміруюць паўнацэнныя вытворчыя ланцужкі, што павышае ўстойлівасць сектара да рызык і адкрывае перспектывы для далейшага росту кітайскай анімацыі на сусветнай арэне.
