Бібліятэкары падабралі тую літаратуру, якая выдадзена нядаўна, якая прыйшла ў бібліятэку ў ранейшыя гады і дзесяцігоддзі, і прысвечана жаночай тэматыцы. Кнігі расказваюць пра жанчын-працаўніц, пра жанчын-воінаў, пра пісьменніц і актрыс, мастачак і навукоўцаў, спартсменак... Героі кніг, прадстаўленых на адмысловай, багатай на біяграфіі і падзеі выстаўцы, — Героі Савецкага Саюза, Героі Сацыялістычнай Працы, тыя, хто складае гонар народа Беларусі, служыць і будзе служыць прыкладам для моладзі ў сваім стаўленні да грамадства, краіны, лёсу Айчыны. 

Віцебскі край — багатая прастора на імёны жанчын, якія ўпрыгожылі XX стагоддзе сваімі творчымі, мастацкімі, літаратурнымі здзяйсненнямі. На Віцебшчыне нарадзіліся знакамітыя паэтэсы Еўдакія Лось, Вера Вярба, Марыя Філіповіч, дзіцячая пісьменніца Маіна Бабарыка, заслужаная артыстка Беларусі Людміла Пісарава, народныя артысткі Беларусі Зінаіда Канапелька, Галіна Арлова і шмат хто яшчэ з яркіх, запамінальных асоб, якія здзейснілі нямала творчых спраў. Пра іх землякі не забываюцца. Увага да іх памяці праяўляецца і ў Віцебскай абласной бібліятэцы імя У. І. Леніна. 

Мікола БЕРЛЕЖ