У фінальнай серыі да чатырох перамог «ваўкі» абыгралі смаленскі «Славуціч» з лікам 4:2. Шосты паядынак адбыўся 24 красавіка ў Жлобіне і завяршыўся з вынікам 5:4. Чатыры ачкі (2+2) за гаспадароў набраў Сяргей Кузняцоў, вырашальную шайбу закінуў Ягор Борыкаў. «Металург» стаў пяціразовым чэмпіёнам Беларусі, пры гэтым упершыню заваяваў тытул на родным лёдзе.

«Вельмі хацелі скончыць серыю дома, падарыць нашым балельшчыкам свята. Рады, што атрымалася. Матч быў цяжкі, шмат прапускалі. Перад трэцім перыядам сур’ёзна пагаварылі з хлопцамі, крыху супакоіліся і давялі справу да перамогі, — сказаў Дзмітрый Саяпін. — Перад сезонам ставілі задачу прыйсці да фінішу першымі і з гэтай думкай жылі ўвесь год. Чэмпіянат быў няпросты, але гэта, мабыць, і добра, паколькі лёгкасць супакойвае. Пастаянна былі ў напружанні, праходзілі складаныя этапы, нават у чвэрцьфінал трапілі ў апошні момант. У такіх сітуацыях каманда ўсё больш загартоўвалася, стала моцным калектывам, і ў плэй-оф гэта было відаць. Велізарная ўдзячнасць нашым балельшчыкам. Жлабінчане — лепшыя ў лізе, яны заслужылі гэты трафей».

У рэгулярным чэмпіянаце «ваўкі» фінішавалі шостымі сярод 14 каманд экстралігі, а ў чвэрцьфінале і паўфінале плэй-оф з аднолькавым лікам 4:2 прайшлі абодвух фіналістаў мінулага сезона — «Віцебск» і «Юнацтва». Раней «Металург» браў Кубак Прэзідэнта ў 2012, 2022, 2023 і 2024 гадах.