Мужчына набыў BMW X6 2020 года выпуску. Пры пастаноўцы аўтамабіля на ўлік у супрацоўнікаў ДАІ ўзніклі сумненні ў сапраўднасці ідэнтыфікацыйнага нумара (VIN) і пасведчання аб рэгістрацыі транспартнага сродку.

Для ўстанаўлення ўсіх абставін у Гродзенскім міжраённым аддзеле Дзяржаўнага камітэта судовых экспертыз праведзены судовыя экспертызы. Эксперты высветлілі, што ідэнтыфікацыйны нумар аўтамабіля BMW X6 з’яўляецца першапачатковым і ніякім зменам не падвяргаўся. А вось бланк пасведчання аб рэгістрацыі транспартнага сродку быў выраблены не на прадпрыемстве, якое ажыццяўляе вытворчасць прадукцыі гэтага віду. Выявы пярэдняга і адваротнага бакоў бланка выкананы спосабамі плоскага афсетнага і электраграфічнага друку, а элементы абароны бланка — імітаваны.

Праваахоўнікі ўстанавілі, што набыты аўтамабіль знаходзіцца ва ўгоне ў Расійскай Федэрацыі. Пакупнік патлумачыў, што набыў машыну ў свайго знаёмага ў Расіі і не ведаў аб яе крымінальным мінулым.

УУС адміністрацыі Кастрычніцкага раёна Гродна праводзіць праверку. Вынікі судовай экспертызы далучаны да матэрыялаў справы.