У Ленінскае РУУС сталіцы звярнуўся 21-гадовы мінчанін, які стаў ахвярай кібермахляроў і пазбавіўся 20 000 рублёў.

Заяўнік расказаў міліцыянерам, што атрымаў у спадчыну буйную суму грошай і вырашыў іх прымножыць, уклаўшы ў крыптавалюту. Ён перавёў наяўныя грошы на электронны кашалёк, знайшоў у інтэрнэце кансультанта па інвеставанні і зарэгістраваўся на біржы. Таксама па парадзе брокера малады чалавек пагадзіўся паўдзельнічаць у акцыі, каб хутка зарабіць да 50% ад дэпазіту.

Мінчанін перайшоў па спасылцы, якую адправіў яму кансультант, і пералічыў усе свае грошы, пасля чаго з ім перасталі выходзіць на сувязь.

Устаноўлена, што заяўнік не ўдзельнічаў у рэальных таргах, а пераводзіў грошы на электронны кашалёк іншай фізічнай асобы.

Распачата крымінальная справа за махлярства.

Як не стаць ахвярай кіберзлачынцаў, якія прапануюць «зарабіць на біржы», — нагадала старшы інспектар ДІГС Ленінскага РУУС Таццяна Кавалёва:

— У апошні час сапраўды набірае абароты новы від злачыннай дзейнасці ў сетцы Інтэрнэт — махлярства з дапамогай так званага «заробку на крыпце», заснаванага на даверлівасці грамадзян.

Што рабіць, каб не патрапіць на вуду зламыснікаў?

1. прайсці навучанне па асновах трэйдзінгу і крыпторынка
2. карыстацца праверанымі сэрвісамі, абменнікамі, біржамі
3. не пераходзіць па падазроных спасылках, дзе прапануюць імгненна зарабіць «лёгкія» грошы
4. не ўкладваць усе свае сродкі ў невядомы праект

Калі вы сталі ахвярай злачынства — паведаміце аб гэтым па тэлефоне 102.