У Іўеўскі РАУС звярнулася 38-гадовая жыхарка раёна. Жанчына паведаміла, што, даверыўшыся ашуканцам, пазбавілася вялікай сумы грошай.

Некаторы час таму пацярпелая прадала дом. Грошы, атрыманыя ад продажу нерухомасці, яна вырашыла памножыць. На прасторах інтэрнэту жанчына знайшла аб’яву аб магчымасці заробку на біржы і пакінула заяўку.

Неўзабаве ёй патэлефанавалі ў Telegram і расказалі, як можна павялічыць свае зберажэнні. Пры гэтым паведамілі, што чым вышэйшыя будуць укладанні, тым большым будзе прыбытак. У агульнай складанасці, паразмаўляўшы з карыстальнікамі VLADA_BASOVA_S і BASOVA_V1309, жанчына адправіла ім звыш Br112 тыс.

Крыху пазней ашуканцы паведамілі, што яна парушыла ўмовы працы на біржы, таму ўсе грошы, якія былі ўкладзены, сыходзяць ім. Пасля гэтага грамадзянка звярнулася па дапамогу ў міліцыю.