У кастрычніку 2024 года абвінавачаная прыйшла ў фітнес-клуб на вул. П. Мсціслаўца. Завяршыўшы трэніроўку, яна прыхапіла з сабой з жаночай раздзявалкі чужое паліто коштам больш за 700 рублёў.

Адчуўшы беспакаранасць, у студзені зламысніца пайшла з гэтага ж фітнес-клуба з чужым футрам за 398 рублёў, якое вынесла ў пакеце.

Абедзве пацярпелыя звярнуліся з заявамі ў міліцыю. Жыхарку Мінскага раёна затрымалі, у дачыненні да яе распачалі крымінальную справу. Віну фігурантка прызнала часткова — настойвала, што чужое паліто нібыта ўзяла памылкова, пераблытаўшы са сваім.

— У абвінавачанай вышэйшая адукацыя, яна нідзе афіцыйна не працаўладкавана, раней да крымінальнай адказнасці не прыцягвалася, — пракаментавала старшы памочнік пракурора Першамайскага раёна Юлія Лугоўская, якая выступала дзяржаўным абвінаваўцам па крымінальнай справе. — Суд прызнаў яе вінаватай у здзяйсненні злачынстваў, прадугледжаных ч. 1 і ч. 2 арт. 205 КК («Крадзеж»), і прызначыў канчатковае пакаранне ў выглядзе штрафу ў памеры 100 базавых велічынь (4200 рублёў).