У Магілёўскі РАУС звярнуліся грамадзяне з заявамі аб тым, што ўнеслі задатак за ўнутранае аздабленне жылля, аднак абавязацельствы выкананы не былі. Агульная шкода склала больш за 13 тыс. бел. руб.

Супрацоўнікі крымінальнага вышуку ўстанавілі асобу падазраванага. Ім аказаўся 25-гадовы раней судзімы мужчына. Высветлілася, што атрыманыя ад кліентаў грашовыя сродкі ён траціў на асабістыя патрэбы, першапачаткова не плануючы выконваць узятыя на сябе абавязацельствы.

У дачыненні да фігуранта распачата крымінальная справа па факце махлярства ў буйным памеры.

У ведамстве нагадалі, каб не стаць ахвярай падобных злачынстваў, трэба заключаць дагавор на выкананне работ толькі ў пісьмовай форме з указаннем тэрмінаў і аб’ёму паслуг. Важна правяраць звесткі аб індывідуальным прадпрымальніку, наяўнасць рэгістрацыі і дзелавую рэпутацыю. Не варта перадаваць буйныя сумы грошай без дакументальнага пацвярджэння аплаты. Пры ўзнікненні падазрэнняў неабходна неадкладна звяртацца ў органы ўнутраных спраў.