Віцебчане сёння сустрэлі ў сваім горадзе «Цягнік Перамогі» — інтэрактыўны музей у чыгуначным саставе, лакацыі якога прысвечаны падзеям Вялікай Айчыннай вайны. У цягніку экскурсію праводзіць аўдыягід — кожнаму наведвальніку выдаюць навушнікі, праз якія ён чуе аповед аб ваенных гадах, ходзе баявых дзеянняў. Экспазіцыі ўсе насычаныя, разнапланавыя, і ў кожнай ёсць мноства дэталяў, якія можна разглядаць вельмі доўга. За кошт таго, што за «вокнамі» (мультымедыйнымі экранамі) мільгаюць пейзажы, гучыць стук колаў, з’яўляюцца адчуванні поўнага апускання ў атмасферу тых гадоў. Грамадзяне, якія едуць на адпачынак і па сваіх справах, гарадскія кватэры ў першыя дні вайны, салдаты, што адбіваюць нападзенні ворагаў, параненыя ў шпіталі, зняволеныя канцлагеры — у кожным з вагонаў на экскурсанта глядзіць сама гісторыя, эпоха выпрабаванняў, пакуты, боль народа, які заваяваў Перамогу неймавернымі намаганнямі і надмернай цаной.
Школьніца Лізавета Хірэвіч расказала, што «Цягнік Перамогі» пакінуў у яе незгладжальныя ўражанні. «Мне спадабалася ўсё. Кожны вагон напоўнены памяццю Вялікай Айчыннай вайны. Усё арганізавана вельмі добра. Было адчуванне, што я сама еду разам з гэтым цягніком. Кожнаму чалавеку пажадаю тут пабываць», — адзначыла юная жыхарка Віцебска.
Яе сяброўка Вікторыя Чарноўская падкрэсліла, што яе ўразіла афармленне кожнай лакацыі. «Уражанні незабыўныя, калі ідзеш па цягніку, адчуваеш, што было тады, часам нават да слёз. Кожны новы вагон быў цікавей за папярэдні, нават не магу вылучыць адзін. Усе манекены, якія там знаходзіліся, былі як жывыя. Вельмі ўражвае, што ў нас такое ёсьць. Гэта вельмі крута, і памяць аб вайне мы павінны захоўваць вечна, каб гэтага больш не паўтарылася», — сказала яна.
Такія ж моцныя ўражанні атрымалі і дарослыя. Настаўнік гісторыі Аляксандр Вайцяхоўскі з сярэдняй школы № 17 адзначыў, што на юнакоў і дзяўчат такая форма падачы матэрыялу аб Вялікай Айчыннай вайне ўздзейнічае нашмат мацней, чым звычайныя ўрокі за партай. «Адна справа чытаць ці чуць нешта, а іншая — убачыць на свае вочы тое, як гэта выглядала, у тым ліку цягнікі ваеннага часу. Для транспартнага класа, дзе я з’яўляюся класным кіраўніком, асабліва цікава было даведацца пра ўсё, што было звязана з чыгункай, як ішлі баявыя дзеянні на ёй. Для дзяцей гэта псіхалагічна цікавей. Я асабіста не магу вылучыць нейкую лакацыю, лічу, што ў цэлым такі фармат унікальны, ён эмацыйна больш насычаны. І акрамя таго, гэта цудоўны патрыятычны праект, прычым не толькі для маладога, але і старэйшага пакалення», — выказаў сваё меркаванне педагог.
З экспазіцыяй «Цягнік Перамогі» пазнаёміўся і старшыня Віцебскага аблвыканкама Аляксандр Субоцін. Ён падкрэсліў, што прыбыццё састава ў абласны цэнтр з’яўляецца сімвалічным, бо днямі Віцебск адзначыў 81-ю гадавіну вызвалення ад нямецка-фашысцкіх захопнікаў і 1051-годдзе з дня заснавання. «Гэта сакральная падзея, якая выклікае гонар», — падкрэсліў ён.
Адміністратар цягніка Анастасія Бабанава падзялілася, што інтэрактыўны перасовачны музей пабываў у многіх беларускіх гарадах. Па наведвальнасці пабіў рэкорды Магілёў, дзе толькі за адзін дзень на экскурсіях пабывалі больш за 2,2 тыс. чалавек. Яна расказала, што людзі часам плачуць, а часам даведаюцца некаторыя рэчы — аналагічныя ўзнагароды, абрусы, якія захаваліся ў іх дамах, і гэта ўзмацняе эмацыйны эфект ад убачанага.
