«Умовы надвор’я сёлета былі складанымі, цёплыя дні летам можна палічыць па пальцах. Планы падводнай археалагічнай групы мяняліся на вачах. У пачатку года ўзровень вады быў даволі нізкі, таму рыхтаваліся да сухога сезона. Але вясна ўсё скарэктавала. Калі ў мінулыя гады мы працавалі на глыбінях парадку 1,5 м, цяпер — каля 2 м. Але з іншага боку, гэта забяспечыла добрую празрыстасць вады. На дадзены момант мы скончылі некалькі падводных экспедыцый — на Крывінскім тарфяніку, на возеры Сялява», — сказаў Сяргей Ліневіч.

Ён адзначыў, што Крывінскі тарфянік — гэта ўнікальны помнік на тэрыторыі Еўропы, паселішча эпохі неаліту. «Там захавалася арганіка пад стэрыльным пластом торфу на глыбіні больш за 2 м. Мала дзе ў Еўропе мы можам зазірнуць у мінулае — літаральна ў акно неалітычнай пабудовы, паглядзець, як там размяшчаліся рэчы. Мы маем справу з адным з самых старажытных жылых комплексаў, якія захаваліся на нашай тэрыторыі, ён вельмі значны для нашай гісторыі. Сёлета з’явіліся новыя артэфакты — набор касцяных упрыгажэнняў, прылады працы з косці і каменя», — праінфармаваў навуковец.

У Крупскім раёне на возеры Сялява працавала комплексная экспедыцыя: падводная археалагічная група і даследаванні на сушы — на помніках каменнага і жалезнага веку. «Матэрыял атрыманы вельмі багаты. Унікальная сітуацыя: пад метровым шурфам - каменная шліфаваная сякера, — дадаў Сяргей Ліневіч. — У цэлым унікальныя артэфакты ў Клішынскім мікрарэгіёне. У прыватнасці, на невялікім пярэсмыку шырынёй 10-12 м мы ў выніку шурфоўкі выяўляем матэрыялы, якія закранаюць фактычна ўсе эпохі — ад мезаліту да жалезнага веку. Перад намі ставяцца новыя задачы — як гэты аб’ект вывучыць і як яго захаваць для будучых пакаленняў».