«Нас вельмі ўразіла, якія намаганні прыкладвае беларускі ўрад, клапоцячыся пра сваіх грамадзян. Тое, як шмат намаганняў укладзена ў гэтую ўстанову аховы здароўя, тое, што любы можа звярнуцца сюды і атрымаць дапамогу, нас узрушыла», — сказала Мэйбл Мемары Чынамона.

Старшыня Сената Зімбабвэ адзначыла, што цэнтр «Маці і дзіця» важны для краіны, і дзяржава гэта разумее. «Нашай краіне трэба нешта падобнае. Менавіта тут мы бачым магчымасць для супрацоўніцтва і ў сферы навучання кадраў, і ў сферы любога іншага супрацоўніцтва, каб пабудаваць нешта падобнае ў нашай краіне», — дадала яна.

Старшыня Савета Рэспублікі Наталля Качанава пацвердзіла, што гэтыя пытанні абмяркоўваліся падчас наведвання РНПЦ «Маці і дзіця». Спікер адзначыла, што ў гэтым цэнтры аказваецца дапамога ў тым ліку сем’ям, якія не могуць мець дзяцей і робяць усё магчымае, каб гэта шчасце ў іх здарылася. Тут вядуць самыя цяжкія выпадкі. Акрамя таго, гэта навуковы цэнтр, дзе ўкараняюцца новыя тэхналогіі і распрацоўкі, якімі Беларусь дзеліцца з замежнымі калегамі.

Па словах спікера, парламентарыі з Зімбабвэ цікавіліся не толькі аказаннем дапамогі сем’ям і жанчынам. Яны выказалі зацікаўленасць у тым, каб спецыялісты з Зімбабвэ прайшлі навучанне ў РНПЦ «Маці і дзіця». Таксама адзначылі гатоўнасць прыняць у сябе беларускіх медыкаў для аказання практычнай дапамогі ў лячэнні, выходжванні дзетак, якія нарадзіліся з нізкай вагой. Гэтыя пытанні будуць адпрацаваныя.

Візіт парламенцкай дэлегацыі Зімбабвэ сведчыць аб выкананні дамоўленасцяў, якія былі дасягнуты ў ходзе візіту Прэзідэнта Беларусі ў Зімбабвэ ў 2023 годзе і візіту ў адказ Прэзідэнта Зімбабвэ ў Беларусь у 2025 годзе, падкрэсліла Старшыня Савета Рэспублікі. Была падпісана дарожная карта стратэгічнага супрацоўніцтва, дзе вызначаны мерапрыемствы па супрацоўніцтве па розных напрамках. 

«Учора Прэзідэнтам нам было дадзена даручэнне ўзяць на кантроль выкананне тых мерапрыемстваў, якія былі закладзены ў дарожную карту па супрацоўніцтве з гэтай краінай. Мы будзем рабіць усё для таго, каб дамоўленасці, дасягнутыя на вышэйшым узроўні, былі выкананыя. Каб гэта было на карысць нашых народаў і нашых краін», — заключыла Наталля Качанава.