Нацыянальны банк Рэспублікі Беларусь анансаваў выпуск у абарачэнне 15 чэрвеня 2026 года новай інвестыцыйнай манеты з каштоўнага металу. «Славянка» адносіцца да катэгорыі зліткавых (інвестыцыйных) манет, мае намінал 20 рублёў, масу 31,1 г, дыяметр 38,6 мм, пробу сплаву 999,9 і тыраж 15 000 штук.
У цэнтры рэверса на адваротным баку размешчаны рэльефны партрэт маладой славянкі, якая трымае на руках малое дзіця. Па баках намаляваны дзве райскія птушачкі, якія сімвалічна дапаўняюць духоўнае і лірычнае напаўненне ўсёй кампазіцыі. У верхняй частцы па крузе чытаецца назва манеты.
Вырабам манеты займалася ААТ «Гомельскае ВА «Крышталь» — кіруючая кампанія холдынга «Крышталь-Холдынг». Чаканка выканана ў якасці анцыркулейтэд, што прадугледжвае стандартнае матавае пакрыццё без люстраных палёў.
Як расказалі ва ўпраўленні інфармацыі і грамадскіх сувязяў Нацыянальнага банка Рэспублікі Беларусь, дата паступлення манеты ў продаж будзе паведамлена дадаткова. З’яўляючыся законным плацежным сродкам Рэспублікі Беларусь, яна абавязковая да прыёму па яе намінальным кошце (20 рублёў) пры ажыццяўленні ўсіх відаў плацяжоў на тэрыторыі краіны без якіх-небудзь абмежаванняў.
Аміна НАЗАРАВА
Фота Нацыянальнага банка Рэспублікі Беларусь
