Top.Mail.Ru

Злоўлены з доказамі злачынства: рыбалка ў Сенненскім раёне абярнулася крымінальнай справай

Супрацоўнікі Віцебскай абласной інспекцыі аховы жывёльнага і расліннага свету сумесна з калегамі з Аршанскай міжраённай інспекцыі спынілі факт браканьерства на возеры Серакаротня, размешчаным на тэрыторыі Сенненскага раёна. Пра гэта БелТА паведамілі ў Дзяржаўнай інспекцыі аховы жывёльнага і расліннага свету пры Прэзідэнце Беларусі.



Падчас палявога мерапрыемства дзяржінспектары затрымалі на месцы злачынства двух мясцовых жыхароў з гарадскога пасёлка Багушэўск. Мужчыны вырашылі парыбачыць забароненым спосабам — з выкарыстаннем дзвюх стаўных сетак.

Здабычай парушальнікаў стала азёрна-рачная рыба. Аднак замест таннай вячэры нелегальная рыбалка прынесла ім вялікі рахунак ад дзяржавы. Шкода, прычыненая навакольнаму асяроддзю незаконнай лоўляй, склала 143,9 базавых велічынь.

Паколькі сума шкоды перавысіла буйны памер (ад 100 базавых велічынь), адміністрацыйнай адказнасцю парушальнікі не абыдуцца. На месца здарэння была выкліканая следча-аператыўная група. Па дадзеным факце вырашаецца пытанне аб узбуджэнні крымінальнай справы за незаконную здабычу рыбы, якая пацягнула прычыненне шкоды ў буйным памеры (ч. 2 арт. 281 КК Беларусі). 

Дзяржінспекцыя заклікае грамадзян не заставацца ўбаку і паведамляць вядомую інфармацыю аб фактах браканьерства або незаконнага захоўвання прылад палявання па кругласутачным тэлефоне даверу.

arrow
Нашы выданні

Толькі самае цікавае — па-беларуску!

Напішыце ў рэдакцыю