Што датычыцца новага раўнда перапісу, то ў чэрвені 2025 года Эканамічны і сацыяльны Савет ААН прыняў рэзалюцыю аб сусветнай праграме перапісаў насельніцтва і жыллёвага фонду раўнда 2030 года, у якой заклікае ўсіх удзельнікаў-членаў правесці перапіс насельніцтва, адзначыла Іна Мядзведзева. «Рэспубліка Беларусь, якая дакладна выконвае дзесяцігадовы інтэрвал, у год, які сканчаецца на дзявятку, праводзіць перапіс насельніцтва. Адпаведна, мы ўжо рыхтуемся да перапісу насельніцтва 2029 года. Ключавым напрамкам нашай работы сёння з’яўляецца перагляд заканадаўства, а менавіта закона «Аб перапісе насельніцтва». Нам неабходна яго актуалізаваць з улікам праведзенага перапісу 2019 года і яго вынікаў. Плюс закласці тыя пытанні, якія сёння найбольш актуальныя, — гэта максімальнае выкарыстанне адміністрацыйных рэсурсаў», — падкрэсліла яна. 

Белстат плануе, як і ў мінулы раўнд, праводзіць камбінаваны перапіс. «Гэта інтэрнэт і планшэты. Спадзяёмся, што ў 2029 годзе атрымаем значна большы працэнт людзей, якія пройдуць перапіс па інтэрнэце. Мы таксама разглядаем пытанні падключэння штучнага інтэлекту на пэўных этапах апрацоўкі інфармацыі, — расказала кіраўнік камітэта. — Будзем выкарыстоўваць адміністрацыйныя рэсурсы і перадзапаўненне, але будуць і пытанні, на якія неабходна будзе чалавеку адказаць самастойна. Гэта пытанні, якія датычацца ў большай ступені занятасці і міграцыйнай актыўнасці, бо людзі досыць мабільныя сёння». 

 

Упершыню інтэрнэт-перапіс быў праведзены ў 2019 годзе, і такая практыка паказала вельмі добрыя вынікі, звярнула ўвагу Іна Мядзведзева. «Самастойна запоўнілі анкету ў інтэрнэце 22 % насельніцтва Беларусі. Пры гэтым перапісны ліст, які запаўняецца ў такім фармаце, найбольш поўны, бо праграмны прадукт не дазваляў не адказаць на ўсе пытанні, — адзначыла яна. — З улікам таго, што мы выходзілі на беспапяровы перапіс, то як на планшэтах, так і ў інтэрнэце ў нас былі лагічныя, арыфметычныя кантролі, якія дазвалялі дамагчыся максімальнай якасці атрыманых вынікаў. У сувязі з гэтым адназначна можна сказаць, што інтэрнэт-лісты былі найбольш якасныя і па паўнаце запаўнення, і па тых адказах, якія мы атрымалі ад насельніцтва Беларусі».

Паводле яе слоў, кіраўнік дзяржавы яшчэ ў 2019 годзе паставіў задачу аб пераходзе на рэгістравыя перапісы, гэта значыць без прамых пытанняў насельніцтву. «Але з улікам таго, што яшчэ не ўсе адміністрацыйныя рэсурсы даюць магчымасць атрымаць максімальны і поўны адказ на тыя ці іншыя пытанні перапісу, у гэты раз мы пастараемся яшчэ больш палепшыць гэтыя сэрвісы, каб на наступны перапіс выйсці на рэгістравую», — сказала Іна Мядзведзева.

Белстат цесна працуе з дзяржаўнымі органамі - уладальнікамі адміністрацыйных рэсурсаў. У прыватнасці, аналізуе склад, структуру і якасць іх даных для наступнага выкарыстання пры правядзенні перапісу насельніцтва.