Як паведамілі спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды, ужо з аўторка да нас рухаецца цёплая няўстойлівая паветраная маса. Далей — 15 і 16 ліпеня — умовы надвор’я ў асноўным будзе вызначаць вобласць павышанага атмасфернага ціску, толькі ў дзённыя гадзіны 15 ліпеня па захадзе, а 16 ліпеня па паўночным усходзе краіны адаб’ецца ўплыў няўстойлівых паветраных мас. Чакаецца пераменная воблачнасць.

У сераду пераважна без ападкаў, толькі днём месцамі па захадзе Беларусі пройдуць кароткачасовыя навальнічныя дажджы. Ноччу і раніцай у асобных раёнах будзе згушчацца слабы туман. Вецер паўночнай чвэрці ўмераны, днём пры навальніцах парывісты. Тэмпература паветра ўначы — ад плюс 12 да 18 °C, а максімальная днём — 24–30 °C вышэй за нуль.

У чацвер будзе нават цяплей, калі нестабільная порцыя надвор’я перамесціцца ва ўсходнюю палову краіны. У гэты дзень чакаецца пераважна без ападкаў, толькі днём месцамі па паўночным усходзе краіны пройдуць кароткачасовыя дажджы і навальніцы. Ноччу і раніцай у асобных раёнах слабы туман. Вецер паўночнай чвэрці ўмераны, днём пры навальніцах парывісты. Тэмпература паветра ўначы — ад плюс 12 да 18 °С. Днём цалкам камфортна для ліпеня, калі максімальная тэмпература будзе дасягаць 24–31 °С вышэй за нуль.

МНС папярэджвае 

Спецыялісты МНС папярэдзілі аб фактарах небяспекі падчас навальніц. У такое надвор’е магчымы пашкоджанні (абрывы) ліній сувязі і электраперадачы, адключэнне электрычных падстанцый, электраэнергіі ў населеных пунктах. Павышаецца верагоднасць узнікнення лясных пажараў, а таксама пажараў у жылых і вытворчых будынках. Можа адбыцца зніжэнне бачнасці, запаволенне руху транспарту, павялічваецца верагоднасць аварый на дарогах. Магчыма падтапленне асобных дамоў, гаспадарчых пабудоў, агародаў, сельгасугоддзяў, аўтадарог мясцовага значэння.

Сяргей КУРКАЧ