«Сустрэчы з Дзедам Марозам і яго казачнымі памочнікамі, чароўныя фотазоны і маляўнічыя дэкарацыі, гульні, конкурсы, інтэрактыўныя праграмы, а таксама салодкія пачастункі і сюрпрызы для дзяцей і дарослых падрыхтавалі ў навагодніх сядзібах Гродзеншчыны, — расказала галоўны спецыяліст упраўлення культуры аблвыканкама Анастасія Пекар. — Першая з іх — „Гудзевіцкая хатка Дзеда Мароза“ адкрыецца ўжо 8 снежня і будзе працаваць даўжэй за ўсіх, да 28 студзеня 2026 года. А з сярэдзіны апошняга месяца адыходзячага года навагоднія рэзідэнцыі масава расчыняць дзверы».

У Гродне «Гарадскі маёнтак Дзеда Мароза» запросіць на інтэрактыўнае навагодняе прадстаўленне па матывах казкі «Кот у ботах» з 16 снежня па 6 студзеня ў Цэнтры рамёстваў «Спадчына». Дзеці і дарослыя змогуць акунуцца ў любімую казку, пагутарыць з галоўнымі навагоднімі героямі, загадаць запаветныя жаданні і адправіцца ў займальныя квэсты.

У кожным раёне маёнткі Дзеда Мароза па-свойму арыгінальныя. Так, у «Рэзідэнцыі «Бераст-Зюзі і Спадарыні Завеі» рыхтуюць сустрэчу з персанажам беларускіх легенд Зюзяй. У Гродзенскім раёне маленькіх гасцей чакае «Лялечны дом Дзеда Мароза». У музеі лялькі Індурскага цэнтра культуры абяцаюць майстар-клас па роспісе імбірных пернікаў, пошту Дзеда Мароза і фотабудку, а таксама ўпершыню — сустрэчу з новай гераіняй, дачкой Бабы Ягі — Ліхвой. У Лідскім раёне хлопцаў і дзяўчынак паклічуць у зімовы лес, у дзіцячы лагер «Бярозка». Як і ў Смаргонскім, дзе арганізацыяй свята сумесна заняліся мясцовы цэнтр культуры і вопытны лясгас. У горадзе беларускіх атамшчыкаў Астраўцы рэзідэнцыю Дзеда Мароза сімвалічна адкрыюць на новым праспекце Энергетыкаў.