Беларускі дзяржаўны ўніверсітэт інфарматыкі і радыёэлектронікі абвясціў аб старце адборачнага тура алімпіяды BІT-Cup 2014. Гэтыя спаборніцтвы разлічаны на таленавітых студэнтаў, якія навучаюцца найбольш запатрабаваным на рынку інфармацыйным тэхналогіям.
Конкурсныя заданні распрацоўваюцца вядучымі ІТ-кампаніямі (Cіsco Systems, Promwad, Alіs Games, МіСофт). Студэнты могуць паўдзельнічаць у любым з відаў конкурснай праграмы: у сеткавай алімпіядзе CІSCO Systems, распрацоўцы гульняў для мабільных прылад, адміністраванні Lіnux, распрацоўцы мабільных дадаткаў ці праграмаванні платформы. Адметнай рысай спаборніцтваў, якія, дарэчы, праводзяцца ўпершыню, з'яўляецца менавіта іх практычная арыентаванасць.
На думку выканаўчага дырэктара кампаніі Alіs Games Дзяніса Вайханскага, галоўная праблема беларускай ІТ-галіны заключаецца ў тым, што, валодаючы фантастычным патэнцыялам у гэтай сферы, мы не выкарыстоўваем яго паўнавартасна:
— Мабільныя тэхналогіі — гэта новы рынак, і большая колькасць грошай ІТ-галіны сёння менавіта там. Мы спадзяёмся абудзіць ва ўдзельнікаў алімпіяды інтарэс да стварэння ўласных прадуктаў для мабільных устройстваў, паказаць, што гэта рэальна і нескладана.
У пераможцаў алімпіяды будзе магчымасць прайсці вытворчую практыку ў вядучых сусветных ІТ-кампаніях з наступным працаўладкаваннем.
Прыняць удзел у алімпіядзе BІT-Cup 2014 могуць студэнты і магістранты любых курсаў і формаў навучання ўстаноў вышэйшай і сярэдняй спецыяльнай адукацыі. Для гэтага трэба да 15 сакавіка зарэгістравацца на афіцыйным сайце алімпіяды.
Надзея НІКАЛАЕВА.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?