...але замест двух патокаў застанецца адзін.
2 мая ў краіне распачалася рэгістрацыя абітурыентаў на цэнтралізаванае тэсціраванне, якая будзе доўжыцца да 1 чэрвеня ўключна. Такім чынам, для таго, каб запасціся пропускамі на ЦТ, абітурыентам даецца амаль цэлы месяц, на працягу якога яны могуць завітаць у любы бліжэйшы да іх месца жыхарства пункт рэгістрацыі. Усе пункты падключаны да аўтаматызаванай сістэмы «Агульнарэспубліканскі банк звестак удзельнікаў ЦТ». Сістэма працуе па прынцыпе «аднаго акна»: сама шукае свабодныя пасадачныя месцы і падказвае рэгістратару, у якіх навучальных установах можна здаць тыя ці іншыя прадметы. Яна дазваляе падабраць абітурыенту найбольш зручнае для экзамену месца, нават калі той пажадае здаваць цэнтралізаванае тэсціраванне ў іншым горадзе.
Хто не паспеў — той спазніўся
— Аднак, як сведчыць вопыт папярэдніх гадоў, некаторым маладым людзям нават цэлага месяца, які адводзіцца для рэгістрацыі, усё роўна не хапае, а на наступны дзень пасля закрыцця пунктаў рэгістрацыі яны пачынаюць шукаць варыянты, просяць увайсці ў іх становішча і ў парадку выключэння даць ім магчымасць зарэгістравацца. Хачу папярэдзіць усіх «няпамятлівых»: тыя, хто спозніцца, няхай крыўдуюць самі на сябе і чакаюць наступнай прыёмнай кампаніі, — падкрэслівае міністр адукацыі Сяргей Маскевіч.
У адрозненне ад папярэдняга года колькасць пунктаў правядзення цэнтралізаванага тэсціравання скарацілася з 73 да 58, што звязана са змяншэннем агульнай колькасці абітурыентаў. Сказаць, колькі ж знойдзецца сёлета ахвотных штурмаваць ВНУ, у Міністэрстве адукацыі не бяруцца. Дакладна вядома толькі, што колькасць выпускнікоў агульнаадукацыйных школ зменшылася на 6 працэнтаў: з 11-х класаў выпускаюцца 55 тысяч чалавек. Але ж традыцыйна ў прыёмнай кампаніі ўдзельнічаюць і выпускнікі папярэдніх гадоў, а таксама выпускнікі прафесійна-тэхнічных і сярэдніх спецыяльных навучальных устаноў...
Усяго сёлета ва ўстановы вышэйшай адукацыі плануецца прыняць на бюджэтную форму навучання 29,1 тысячы чалавек: 22,9 тысячы чалавек на дзённую і 6,2 тысячы чалавек — на завочную. Прыём на «бюджэт» скарочаны на 1 800 месцаў, пераважна за кошт змяншэння набору на спецыяльнасці эканамічнага і юрыдычнага профіляў.
Зніжэнне парогу
Як зазначыў Сяргей Маскевіч, галоўнай адметнасцю сёлетняй прыёмнай кампаніі стане знікненне двух патокаў пры паступленні і магчымасць правядзення дадатковага набору на вакантныя месцы. Прыём дакументаў на бюджэтныя месцы на ўсе формы навучання будзе праводзіцца ў дзяржаўных ВНУ ў вельмі сціслыя тэрміны — з 8 па 12 чэрвеня. Уступныя іспыты ў ВНУ сілавых ведамстваў пройдуць з 13 па 16 ліпеня, у творчых ВНУ — з 13 па 22 ліпеня, а ва ўсіх астатніх — з 13 па 18 ліпеня.
Залічэнне абітурыентаў на бюджэтныя месцы ў вышэйшыя навучальныя ўстановы МУС і МНС, а таксама ў Інстытут пагранслужбы і Ваенную акадэмію пройдзе па 20 ліпеня; у Акадэміі мастацтваў, Акадэміі музыкі і Універсітэце культуры — па 26 ліпеня. У іншых ВНУ — па 22 ліпеня.
У тым выпадку, калі ў якой-небудзь ВНУ застануцца незапоўненыя бюджэтныя месцы, будзе аб'яўлены дадатковы набор. І вось тут ёсць адзін важны нюанс. На вакантныя месцы змогуць прэтэндаваць абітурыенты, якія не прайшлі па конкурсе пры паступленні ў іншыя ВНУ, але маюць на руках патрэбныя сертыфікаты, або паступалі на іншыя спецыяльнасці ў тую ж ВНУ. Таксама да конкурсу на вакантныя месцы будуць дапушчаны і абітурыенты, якія не набралі на цэнтралізаваным тэсціраванні ўстаноўленую мінімальную колькасць балаў.
Для тых, хто будзе паступаць на бюджэтныя месцы ў рамках дадатковага набору, парог будзе зніжаны на пяць балаў: у сертыфікатах па рускай і беларускай мовах абітурыенты павінны будуць мець не менш як 5 балаў, па матэматыцы, фізіцы, хіміі і біялогіі — 10 балаў ; 15 балаў — па гісторыі Беларусі, сусветнай гісторыі найноўшага часу, грамадазнаўстве, геаграфіі і замежных мовах.
Прыём дакументаў на вакантныя месцы ў ВНУ сілавых ведамстваў будзе весціся з 21 па 25 ліпеня, у «творчых» ВНУ — з 27 па 28 ліпеня, ва ўсіх астатніх — з 23 па 28 ліпеня. Пасля правядзення другой «хвалі» залічэння на вакантныя бюджэтныя месцы абітурыенты змогуць падаваць дакументы на платную форму навучання (да 31 ліпеня). А 2 жніўня стануць вядомыя спісы залічаных на навучанне за ўласныя сродкі.
У ССНУ — па сярэднім бале школьнага атэстата
Яшчэ адна акалічнасць, на якую міністр адукацыі папрасіў звярнуць увагу: гэтым летам выпускнікі базавай школы будуць паступаць у сярэднія спецыяльныя навучальныя ўстановы ўвогуле без экзаменаў (за выключэннем спецыяльнасцяў, дзе прадугледжаны «творчы экзамен»): конкурс будзе ажыццяўляцца па сярэднім бале пасведчання аб агульнай базавай адукацыі. Праўда, у галоўным адукацыйным ведамстве не выключаюць, што на асабліва прэстыжных у моладзі спецыяльнасцях можа скласціся напружаная сітуацыя, калі дакументы пададуць спрэс адны выдатнікі. І як у такім разе прыёмнай камісіі вызначыць з іх самых годных? «Значыць, давядзецца задзейнічаць дадатковыя крытэрыі. У правілах прыёму прапісана, хто мае пераважнае права на залічэнне пры аднолькавай суме балаў. Для прыёмнай камісіі гэта, вядома, будзе выпрабаваннем, але ніхто не перашкаджае ўстанове адукацыі ўвесці і свае дадатковыя крытэрыі, калі ў гэтым будзе патрэба», — удакладніў Сяргей Маскевіч.
Што тычыцца набору на мэтавыя месцы, то яго план пакуль яшчэ не сфарміраваны.
— Прызнаемся, нам хацелася б значна актывізаваць работу галіновых міністэрстваў і працадаўцаў і ў плане правядзення прафарыентацыйнай работы з абітурыентамі, і ў плане фарміравання заказу на падрыхтоўку кадраў і большай іх актыўнасці непасрэдна ў працэсе падрыхтоўкі кадраў, — падкрэсліў міністр адукацыі. — Да пачатку прыёмнай кампаніі кантрольныя лічбы прыёму на мэтавую форму навучання будуць Міністэрствам адукацыі зацверджаны. А далей плануем прааналізаваць яе вынікі. Асабіста я лічу вырашэнне кадравых пытанняў праз мэтавую падрыхтоўку спецыялістаў найбольш эфектыўным.
А ці будзе павялічаны тэрмін адпрацоўкі так званых «мэтавікаў»? Сёння для іх дзейнічае наступная формула: выпускнікі вышэйшых навучальных устаноў адпрацоўваюць пасля заканчэння навучання пяць гадоў — два гады па размеркаванні і тры гады па кантракце. А выпускнікі сярэдніх спецыяльных навучальных устаноў абавязаны адпрацаваць на свайго заказчыка тры гады: два гады па размеркаванні і год — па кантракце. Відаць па ўсім, калі нейкія змены і адбудуцца, то на абітурыентаў гэтага года яны не распаўсюдзяцца...
Нагадаем, што, паводле новых правіл прыёму, мэтавую падрыхтоўку дазволена ажыццяўляць па любых спецыяльнасцях, а прэтэндаваць на мэтавы кантракт можа любы абітурыент, незалежна ад месца свайго пражывання, у тым ліку мінчане і жыхары абласных цэнтраў.
Надзея НІКАЛАЕВА.
Сумесныя праекты ядзерных тэхналогій.