Ва ўстановах прафесійна-тэхнічнай адукацыі нашай краіны стартавала прыёмная кампанія, таму ў прыёмных камісіях ужо чакаюць абітурыентаў. Дакументы прымаюцца па 20 жніўня, але набор можа быць падоўжаны, калі застануцца незапоўненыя месцы.
Сёлета 195 устаноў прафтэхадукацыі будуць весці набор амаль па 300 прафесіях. Акрамя таго, прыём для навучання па рабочых прафесіях ажыццяўляюць і 23 установы адукацыі іншых узроўняў, дзе таксама рэалізуюцца адукацыйныя праграмы прафесійна-тэхнічнай адукацыі.
Так, у гэтым годзе адкрыта падрыхтоўка па запатрабаваных рабочых прафесіях у 2 установах сярэдняй спецыяльнай адукацыі, падпарадкаваных канцэрну «Беллегпрам»: размова ідзе аб прафесіі швачкі, памочніка майстра, слесара-рамонтніка, тэрмаапрацоўшчыка швейных вырабаў, абцяжчыка і зборшчыка абутку. А ў Мінскім аўтамеханічным каледжы пачнуць рыхтаваць слесараў па рамонце аўтамабіляў.
Па звестках Міністэрства адукацыі, сёлета ва ўстановы прафтэхадукацыі плануецца прыняць 36,6 тысячы чалавек, што на 2 тысячы чалавек больш, чым летась. Пры гэтым на дзённую форму плануецца залічыць 33,7 тысячы чалавек, у тым ліку 19,5 тысячы — на аснове агульнай базавай адукацыі, 13,3 тысячы — на аснове агульнай сярэдняй адукацыі і 800 чалавек — на аснове спецыяльнай адукацыі.
Акрамя таго, прадугледжаны прыём 1,1 тысячы чалавек на завочную і 1,8 тысячы — на вячэрнюю форму атрымання адукацыі. У параўнанні з папярэднім годам будзе павялічаны набор па профілях «Архітэктура і будаўніцтва» (на 19%), «Сельская і лясная гаспадарка. Садова-паркавае будаўніцтва» (на 13,3%), «Грамадскае харчаванне. Бытавое абслугоўванне» (на 8,6%). У структуры прыёму захоўваюцца тэндэнцыі мінулага года: спецыяльнасці рэальнага сектара эканомікі складаюць больш як 80%.
Для таго, каб прывесці структуру падрыхтоўкі кадраў у адпаведнасць з патрэбамі рынку працы ў рэгіёнах, сёлета быў спынены набор па 150 незапатрабаваных прафесіях і адкрыта падрыхтоўка па 163 новых для асобных устаноў прафтэхадукацыі прафесіях. Дарэчы, па адной з іх (вытворца марожанага) падрыхтоўка распачнецца ўпершыню, а рыхтаваць спецыялістаў для вытворчасці марожанага будуць у Слуцкім дзяржаўным каледжы.
Надзея НІКАЛАЕВА.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?