Яшчэ ў ліпені супрацоўнікі Брэсцкай аблінспекцыі аховы жывёльнага і расліннага свету выявілі факт нямэтавага выкарыстання прылеглага да Дняпроўска-Бугскага канала зямельнага ўчастка. Кобрынскі райвыканкам перадаў землі мясцоваму фермеру. Той раскапаў дамбу і, праклаўшы трубу, запоўніў нізінны ўчастак вадой, утварыўшы забалочаны вадаём.
— На гэтай тэрыторыі, паводле слоў фермера, ён планаваў займацца рыбаводствам. Аднак ні праектавання, ні будаўніцтва сістэмы сажалак не праводзіў. Не было ў яго і дагавора на арэнду створанага вадаёма, хоць па законе гэтая ўмова з'яўляецца абавязковай для ажыццяўлення рыбагаспадарчай дзейнасці, — распавяла прэс-сакратар Дзяржаўнай інспекцыі аховы жывёльнага і расліннага свету пры Прэзідэнце Рэспублікі Беларусь Вольга Грамовіч. — Дарэчы, пра тое фермер быў праінфармаваны яшчэ год таму. Але замест таго, каб прывесці ў парадак свае справы, мужчына ўстанавіў на пад'ездзе да ўчастка агароджу з калючага дроту. Дзяржінспектары вырашылі трымаць пытанне на кантролі. У дачыненні да арандатара распачаты адміністрацыйны працэс за самавольнае правядзенне гідратэхнічных работ. Райвыканкаму, які працяглы час не ажыццяўляў кантроль за мэтавым выкарыстаннем участка, выдадзена прадпісанне з патрабаваннем спыніць такое нядбайнае землекарыстанне.
Сяргей РАСОЛЬКА.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?