Пра гэта ішла размова на сустрэчы Прэзідэнта Аляксандра Лукашэнкі з прадстаўнікамі творчай інтэлігенцыі, паведамляе прэс-служба беларускага лідара.
«У чым прычына таго, што за мінулыя 20-30 гадоў так і не з'явіліся сучасныя «Вайна і мір», «Узнятая цаліна»? Гэта што, адсутнасць талентаў? Ці аб'ектыўныя ўмовы жыцця, калі кніга перастае быць галоўнай крыніцай інфармацыі?» — пацікавіўся кіраўнік дзяржавы.
Аляксандр Лукашэнка лічыць, што не варта звязваць перамены ў чытацкай свядомасці толькі з тэхналагічнай рэвалюцыяй. На яго думку, напружаны рытм жыцця зрабіў стаўленне да літаратуры прагматычным. «Наш сучаснік выбірае кнігі, якія здзіўляюць яго тэмай, героямі альбо становяцца лекамі ад суму. Сур'ёзная літаратура ператвараецца ў чытанне для інтэлектуалаў», — адзначыў Прэзідэнт.
Кіраўнік дзяржавы прапанаваў пабудаваць размову вакол галоўных кампанентаў літаратурнай справы: чытач, кніга, пісьменнік. Прэзідэнт звярнуў увагу на тое, што ў зале сабраліся цікавыя, неардынарныя людзі, з якімі можна пагутарыць не толькі пра стан беларускай літаратуры, але і шырэй — аб духоўнасці, культуры, гістарычным выбары Беларусі.
«Вучоныя сцвярджаюць, што эканамічныя, палітычныя, ваенныя перавагі дзяржавы не ажыццяўляюцца самі па сабе. Яны заўсёды частка і вынік яе духоўнасці і культуры. Развіццё грамадства, жыццё нацыі магчымыя толькі з апорай на вечную трыяду: навуку, адукацыю, культуру», — адзначыў кіраўнік дзяржавы, прапанаваўшы пагаварыць пра тое, якую ролю ў гэтым працэсе адыгрывае мастацкая літаратура.
«Хацелася б пачуць ваша меркаванне пра тое, як сёння захаваць і развіць літаратурныя традыцыі і пры гэтым не адштурхнуць асноўную масу чытацкай публікі. Ці магчыма прапанаваць сучаснаму чалавеку цікавую яму кнігу, а пісьменніку знайсці свайго чытача?» — сказаў Прэзідэнт.
Аляксандр Лукашэнка адзначыў, што не верыць у наступленне «змяркання літаратурнай эпохі ў Беларусі». «У жыцці нашага народа літаратура заўсёды была сродкам пазнання свету і выхавання асобы, — сказаў кіраўнік дзяржавы. — Нездарма паэзія і проза Купалы і Коласа, Багдановіча і Мележа, Караткевіча і Быкава з'яўляюцца крыніцай нацыянальнага гонару многіх пакаленняў беларусаў».
«Чаму найвышэйшая планка, паднятая нашымі вялікімі пісьменнікамі, не адпавядае сучаснаму стану літаратурнага працэсу? — звярнуўся Прэзідэнт да прысутных. — Можа быць, масцітым пісьменнікам перашкаджае інерцыя мыслення, а маладому пакаленню не хапае жыццёвай мудрасці, вопыту? Ці проста змяніўся час і наша літаратура развіваецца ў рэчышчы агульнасусветных тэндэнцый, страціўшы традыцыі нацыянальнай пісьменніцкай школы?»
Прэзідэнт звярнуў увагу на тое, што літаратура заўсёды сілкавала ідэямі і сюжэтамі іншыя віды мастацтва, і пацікавіўся, як развіваецца гэта творчая садружнасць сёння. «Ці справядлівыя прэтэнзіі пісьменнікаў, што сучасныя кампазітары і рэжысёры адвярнуліся ад нацыянальнай літаратуры? Ці прычынай спаду цікавасці з'яўляецца недахоп годных кніг?» — пацікавіўся кіраўнік дзяржавы.
Кажучы пра пісьменнікаў, Аляксандр Лукашэнка звярнуў увагу на адсутнасць вялікіх твораў, нягледзячы на тое што пісьменнікаў нішто не стрымлівае ў свабодзе творчасці.
Прэзідэнт нагадаў, што ў савецкі час у коле творчай інтэлігенцыі было прынята скардзіцца на ціск цэнзуры і закасцянеласць, коснасць сацрэалізму. «Аднак менавіта ў тыя гады літаратура здабыла высокі аўтарытэт. Яўген Еўтушэнка назваў пісьменнікаў людзьмі, у якіх «бродит гордый дух гражданства, кому уюта нет, покоя нет», — сказаў кіраўнік дзяржавы.
«Праўда, я і цяпер, гледзячы нейкія фільмы і чытаючы тыя ці іншыя опусы вялікіх літаратараў, артыстаў і іншага люду з вашага цэха, са здзіўленнем выяўляю, што іх, бачыце, там прыціскалі ў савецкія часы, заціскалі, працаваць не давалі, — сказаў Прэзідэнт. — Але ўсе яны сталі народнымі, усе жылі выдатна тады. Таму я раблю скідку, што цяпер стала модна скардзіцца: «Ах, вось тады нас заціскалі, прыціскалі і гэтак далей». Ну, няхай будзе так».
«У нашы дні ніхто не дыктуе, пра што і як пісаць. Калі дыктуюць, то вы, калі ласка, скажыце, хто і што дыктуе. Сышлі ў мінулае цэнзура і дзяржманаполія на друкаванае слова. Калі не так, вы таксама мне пра гэта скажыце», — звярнуўся кіраўнік дзяржавы да пісьменнікаў.
«Аднак свабода не спарадзіла вялікай літаратуры, а прывяла да расколу пісьменніцкай супольнасці. Што гэта, тупік? Або ў вас ёсць надзея на аднаўленне адзінага творчага поля?» — адзначыў Прэзідэнт.
Пісьменнікі, якія выступілі на сустрэчы, распавялі аб хвалюючых іх праблемах. У прыватнасці, гаворка ішла пра сучасныя тэндэнцыі ў літаратуры і ў цэлым зніжэнні цікавасці да кнігі ў свеце, а не толькі ў Беларусі. І, на іх думку, сёння сфера літаратуры знаходзіцца не ў лепшым стане.
Адказваючы на пытанне, чаму так мала рэкламуюць айчынныя творы і аўтараў, Прэзідэнт зноў вярнуўся да тэмы высакаякасных мастацкіх прадуктаў. «Скажыце: што рэкламаваць? Дайце прадукцыю, якую можна рэкламаваць, і мы сродкі на гэта знойдзем», — адзначыў ён. Прэзідэнт запатрабаваў эфектыўнай аддачы ад сродкаў, якія выдзяляе дзяржава на падтрымку творчых працэсаў. У прыватнасці, ён звярнуў увагу на ўкладанне дзяржавай сродкаў у развіццё кінематаграфічнай галіны. «Аддачы ад гэтага мы пакуль не бачым. А гэта ж грошы народа», — падкрэсліў Аляксандр Лукашэнка.
Дзяржава чакае ад пісьменнікаў твораў, якія спрыялі б выхаванню грамадзян сваёй краіны і патрыятызму. І грошы тут не заўсёды адыгрываюць галоўную ролю. Самае важнае — гэта талент. На мерапрыемстве былі прыведзены прыклады таго, як часам далёкія ад мастацтва людзі без укладання вялікіх сродкаў ствараюць вельмі папулярныя творы.
Гутарка пра літаратуру паступова перацякла ў рэчышча гутаркі аб сферы адукацыі. Гаворка зайшла аб тым, якую літаратуру сёння прапаноўваюць чытаць дзецям у школе і ці дастаткова ў гэтым пераліку беларускіх аўтараў. Удзельнікі сустрэчы лічаць, што варта больш увагі звярнуць на папулярызацыю беларускай мовы як унутры краіны, так і за яе межамі. Прагучала таксама прапанова падумаць аб стварэнні нацыянальнай ВНУ, дзе выкладанне вялося б толькі на беларускай мове.
Было ўзнята пытанне і працы выдавецтваў, у сувязі з чым была выказана думка аб неабходнасці больш уважліва вывучаць чытацкі попыт, адпрацаваць прапановы па конкурсным падыходзе для выдання кніг з дзяржаўнай падтрымкай.
У развіццё гэтай тэмы Аляксандр Лукашэнка заўважыў, што ў краіне не будуць працаваць выдавецтвы, дзейнасць якіх будзе супярэчыць нормам закона. «Дзяржава будзе дзейнічаць у рамках закона і маральных прынцыпаў грамадства, — сказаў Прэзідэнт. — Я заўсёды прашу дзяржаўных служачых быць сумленнымі і справядлівымі. І, калі нейкія пісьменнікі, выдавецтвы будуць супярэчыць гэтым прынцыпам, яны неадкладна будуць закрыты».
Аляксандр Лукашэнка заўважыў, што цяпер у кіно, літаратуры занадта шмат тэм жорсткасці і гвалту, ад якіх большасць чытачоў і гледачоў стамілася. На яго думку, не хапае папулярных твораў, асабліва ў кіно і на тэлебачанні, у якіх распавядаецца аб звычайных чалавечых лёсах.
Удзельнікі сустрэчы выказалі таксама пажаданне, каб у краіне з'явіўся значны літаратурны конкурс. Прэзідэнт падтрымаў гэтую ідэю, адзначыўшы, што крытэрыі адбору і вызначэння пераможцаў павінны выпрацаваць самі пісьменнікі. Аляксандр Лукашэнка прапанаваў правесці конкурс да заканчэння 2014 года і абяцаў наведаць яго фінальную частку, калі будуць падводзіцца вынікі.
У завяршэнне сустрэчы кіраўнік дзяржавы заўважыў, што засталіся незакранутымі яшчэ многія тэмы, і прапанаваў працягнуць размову пазней. Аляксандр Лукашэнка папрасіў вылучыць для наступнай сустрэчы тыя праблемы, якія магчыма вырашыць толькі на ўзроўні Прэзідэнта.
Сумесныя праекты ядзерных тэхналогій.