Аб разбуральным уздзеянні спайсу сёння не кажа толькі лянівы. На Магілёўшчыне, на шчасце, загінулых ад гэтай атруты няма. Але 38 чалавек, якія паспрабавалі яе, прайшлі праз рэанімацыйная аддзяленні. Каб яшчэ раз перасцерагчы моладзь ад небяспечнага кроку, у Магілёве адбыўся «круглы стол», дзе суразмоўцамі студэнтаў Магілёўскага філіяла «БІП — інстытут правазнаўства» сталі прадстаўнікі ўпраўлення Следчага камітэта па Магілёўскай вобласці і ўпраўлення Дзяржкамітэта судовых экспертыз па Магілёўскай вобласці.
Аб тым, наколькі сур'ёзная гэтая пагроза, сведчаць наступныя факты. Калі ў мінулым годзе за 9 месяцаў на Магілёўшчыне была выяўлена 279 выпадкаў незаконнага абароту наркатычных сродкаў, то сёлета за такі ж перыяд — 519. Распачата 288 крымінальных спраў, звязаных з незаконным распаўсюджваннем спайсаў. Спажыўцамі курыльных сумесяў становяцца зусім маладыя людзі, якім усяго па 16-17 гадоў. Яны не разумеюць, наколькі гэта небяспечна.
— На ўзбраенні нашых экспертаў з'явілася сучаснае абсталяванне, якое дазваляе на працягу некалькіх гадзін распазнаваць падазроныя рэчывы, — паведаміў намеснік начальніка ўпраўлення Следчага камітэта па Магілёўскай вобласці Валерый Калін. — Гэта дае магчымасць вельмі аператыўна заносіць новыя прэпараты ў спіс забароненых. У гэтым сэнсе мы нават апярэджваем Расію. А галоўнае, з'явілася магчымасць адразу затрымаць уладальніка курыльнай сумесі. Раней, калі экспертыза займала шмат часу, гэта было праблематычна.
Начальнік упраўлення Дзяржкамітэта судовых экспертыз па Магілёўскай вобласці Мікалай Кулінчык параўнаў чалавека, які спрабуе спайс, з мінёрам. «Тыя людзі, якія займаюцца вырабам наркатычных субстратаў, звычайна вельмі далёкія ад хіміі ў цэлым і фармакалогіі ў прыватнасці, — адзначыў ён. — Яны не думаюць аб тым, якая колькасць рэчыва будзе небяспечнай для будучага спажыўца. У іх мэты іншыя — атрымаць грошы. Іх зусім не турбуе, будзе гэта камусьці каштаваць жыцця або не».
Праваахоўнікі не выключаюць і тое, што з дапамогай спайсаў могуць здзяйсняцца дыверсіі. Уздзеянне гэтых субстратаў на мозг вельмі разбуральнае. Адбываецца «выпальванне» цэлых яго ўчасткаў. Чалавек паступова ператвараецца ў істоту, якой вельмі лёгка кіраваць.
Начальнік упраўлення судова-псіхіятрычных экспертыз упраўлення Дзяржкамітэта судовых экспертыз Антон Балашоў нават успомніў выпадак са сваёй практыкі, калі малады чалавек распавядаў яму аб тым, як пад уздзеяннем галюцынагенных прэпаратаў чакаў на прыпынку ў Магілёве тралейбус, а пад'ехаў цягнік метро.
Моладзь цікавіла, адкуль трапляюць у Беларусь спайсы, як праваахоўнікі змагаюцца з інтэрнэт-пастаўшчыкамі курыльных сумесяў, ці адбываецца прывыканне ад адной спробы, як развіваецца наркатычная залежнасць і наколькі цяжка ад яе пазбавіцца. На гэтыя і іншыя пытанні прагучалі падрабязныя адказы.
Нэлі ЗІГУЛЯ
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?