У рэдакцыю "Звязды" паступае нямала званкоў, у якіх адзінокія пажылыя людзі з розных рэгіёнаў краіны цікавяцца, ці могуць яны заключыць са сваім выканкамам дагавор рэнты, пра які яны ў свой час прачыталі ў нашай газеце. Прыходзіцца тлумачыць, што гэта новая сацыяльная паслуга пакуль рэалізуецца ў якасці эксперымента толькі ў Мінску. Між тым мінчане не вельмі спяшаюцца заключаць дагавор рэнты ці, па-іншаму, пажыццёвага ўтрымання, з дзяржавай. Пакуль на гэта наважыліся толькі 19 пажылых людзей. Чаму? Якія перасцярогі і страхі імі валодаюць? Ці абгрунтаваныя яны? Паспрабуем разабрацца ў гэтым разам з галоўным спецыялістам упраўлення сацыяльных устаноў камітэта па працы, занятасці і сацыяльнай абароны Мінгарвыканкама Таццянай Князевай.
Самым разумным ў нас лічыцца адпісаць кватэру або падарыць яе ўнукам...
— Першы дагавор рэнты быў складзены ўжо ў лютым 2012 года, — успамінае Таццяна Князева. — Гэты мужчына 1937 года нараджэння і сёння жыве ў Кастрычніцкім раёне Мінска і абслугоўваецца сацыяльнымі службамі. Ніякіх скаргаў на абслугоўванне ад яго не паступала. Яму выплачваецца рэнтная выплата ў памеры 3 базавых велічынь. Многія раней казалі: "Гэта капейкі". Але глядзіце самі: калі з гэтым мужчынам заключаўся дагавор, базавая велічыня была роўная 35 тысяч рублёў. Гэта значыць, ён атрымліваў 105 тысяч. На сённяшні дзень базавая велічыня складае 150 тысяч рублёў, і ён атрымлівае дадаткова да пенсіі 450 тысяч.
— Чаму так мала людзей заключылі дагаворы?
— Для адпрацоўкі розных праблемных сітуацый, якія могуць з'яўляцца пры заключэнні такіх дагавораў, гэта дастатковая колькасць, — лічыць наша суразмоўца. — Прычым цікавяцца гэтым пытаннем многія. Але пакуль яшчэ не адпрацавана заканадаўства ў дачыненні да заключэння дагавора рэнты фізічнай асобы (пажылога чалавека) ??з юрыдычнай (Мінгарвыканкамам). Такое ўпершыню ў нашай практыцы, і тут ёсць нюансы.
Мы прапаноўвалі скарэктаваць пастанову і дазволіць заключаць дагаворы таксама і з грамадзянамі, якія дасягнулі 70-гадовага ўзросту і маюць дзяцей. Некаторыя сапраўды маюць дзяцей, якія па законе абавязаны іх утрымліваць. Але іх дзеці зусім ухіліліся ад гэтага і не кантактуюць са сваімі бацькамі, іншы раз на працягу многіх гадоў, нават пражываючы ў адным і тым жа горадзе. Многія з гэтых дзяцей, з іх слоў, не прэтэндуюць на жыллё сваіх бацькоў, яны там не прапісаны, не ўдзельнічалі ў прыватызацыі і не маюць правоў на яго. Іх пажылым бацькам сёння патрэбна дапамога. Яны звяртаюцца да нас, і такіх выпадкаў шмат, але заканадаўства, якое цяпер маецца ў рамках эксперымента, не дазваляе нам з імі заключаць такі дагавор і дапамагаць ім на гэтай аснове.
Да таго ж пажылыя людзі, як правіла, недаверлівыя і асцярожныя, у сілу нават узроставых асаблівасцяў. Яны наогул да ўсяго новага ставяцца вельмі насцярожана, а тым больш да таго, што тычыцца маёмасных адносін. І гэта цалкам нармальна. Раней у дзяржаве былі праблемы, калі ў перыяд перабудовы зніклі ўклады, і многія добра гэта памятаюць. Гэта таксама фактар. А самае галоўнае — гэтыя людзі былі выхаваны на тым, што ўсё вакол дзяржаўнае. І цяпер яны атрымалі права на ўласнасць, але ніхто не навучыў іх, як распараджацца ёю. Самым разумным у нас лічыцца адпісаць кватэру або падарыць яе ўнукам. А як з гэтай нерухомасці атрымліваць грошы пры жыцці, іх ніхто не вучыў.
"Падмануць! Паскораць смерць! Вы што, НТБ не глядзіце?"
Менавіта так мне тлумачылі пажылыя людзі з Клуба бабуль, у якіх я спытала, чаго могуць асцерагацца пажылыя людзі. Так, я НТБ не гляджу. А вось пажылыя людзі вялікі час праводзяць ля тэлеэкранаў і глядзяць расійскія каналы. "Па тэлевізары такія жахі паказваюць! Кватэру забралі, пакінулі старых на вуліцы...", — расказваюць яны.
Але давайце ўдакладнім: хто забраў? Хто збіраецца паскорыць смерць старога чалавека? У сацыяльнага работніка няма ніякай выгады ад смерці пажылога чалавека. Ён працуе на дзяржаву ў тэрытарыяльным цэнтры. І ён не зацікаўленая асоба, бо кватэра гэтая дастанецца не яму. Яна не дастанецца ні тэрытарыяльнаму цэнтру, ні Мінгарвыканкаму. Мінгарвыканкам павінен будзе пасля скону гаспадара гэтае жыллё прадаць па тых цэнах, якія будуць сярэднімі на той момант, каму-небудзь з чаргавікоў.
— Наадварот, калі ў сацработніка ёсць на абслугоўванні пастаянныя кліенты, паміж ім і гэтымі людзьмі складваюцца нейкія адносіны, яны прыціраюцца адзін да аднаго, падладжваюцца, і яму лягчэй і камфортней працаваць пры гэтым, — тлумачыць Таццяна Князева.
А вось калі дагавор рэнты заключаецца з фізічнай асобай: сваяком, суседкай або знаёмай, то тут ужо прысутнічае прамая зацікаўленасць чалавека.
Рэнтавыя ўзаемаадносіны паміж фізічнымі асобамі існуюць даўно: такія дагаворы заключаюць адзін з адным сваякі, знаёмыя. Але немалая колькасць іх пасля скасоўваецца. Чаму? Спачатку, як правіла, усё ідзе добра. Але з часам пачынаюцца нейкія праблемы дома, і заехаць да бабулі не атрымліваецца. Далей — больш: то чалавек адчувае сябе дрэнна або стаміўся, то зіма, на вуліцы цёмна і холадна, а ехаць, напрыклад, трэба на іншы канец горада. І бабуля раптам пачынае ўспрымацца капрызнай, занадта патрабавальнай...
Увага і клопат паступова ідуць на змяншэнне, а ў выніку бабуля не задаволена, ужо шкадуе аб тым, што заключыла рэнту, і пачынае думаць аб скасаванні дагавора. А сацыяльны работнік прыязджае да пажылога чалавека ў свой ??працоўны час — гэта яго работа, за якую ён атрымлівае грошы, і адвільваць з часам ад яе ён не стане.
Да таго ж дагаворам прадугледжана, што калі пажылы чалавека не знойдзе агульнай мовы з сацыяльным работнікам, то для яго абслугоўвання знойдуць іншага чалавека.
***
Дарэчы, паводле звестак спецыялістаў Камітэта па працы, занятасці і сацабароне Мінгарвыканкама, за 2013 год пенсіянер, які першым заключыў дагавор аб пажыццёвай рэнце, атрымаў 3 млн 870 тыс. рублёў рэнтавых выплат. Камунальныя паслугі яму аплачвае дзяржава (летась гэта склала амаль 4 млн руб.), тэрытарыяльны цэнтр плаціць з пазабюджэтных сродкаў за тэлебачанне і радыё (35-40 тыс. руб.). Нядаўна ў яго кватэры былі заменены краны. Сваю пенсію пажылы чалавек таксама працягвае атрымліваць.
Святлана Бусько.
Сумесныя праекты ядзерных тэхналогій.