Абараняць правы беларускіх дзяцей будзе лідар гурта «J:Морс» Уладзімір Пугач
«Я зімой часцей начаваў з сабакам у будцы, бо ён цёплы, яго можна абняць і грэцца. А мама з татам дома напіваліся і забываліся тапіць». Гэта сведчанне выхаванца адной са школ закрытага тыпу ў Магілёве, дзе навучаюцца дзеці ў канфлікце з законам. Тое, што падобнае адбываецца ў дастаткова спакойнай краіне, дзе няма эпідэмій, людзі не паміраюць ад голаду і холаду, уразіла вядомага беларускага артыста Уладзіміра Пугача. Да такой ступені, што днямі ў сталічнай гасцініцы «Пекін» адбылася цырымонія яго ўступлення на пасаду пасла добрай волі Дзіцячага Фонду ААН (ЮНІСЕФ).
На ўрачыстасці прысутнічалі рэгіянальны дырэктар ЮНІСЕФ для краін Цэнтральнай і Усходняй Еўропы і СНД Мары-П'ер Пуар'е, прадстаўнік Дзіцячага фонду ААН (ЮНІСЕФ) у Беларусі Юрый Аксамітны і, як кажуць у такіх выпадках, самі віноўнік свята з жонкай.
— ЮНІСЕФ працуе з Уладзімірам ужо дастаткова вялікую колькасць гадоў. У нас была магчымасць пераканацца ў важнасці і плёне такога ўзаемадзеяння, — сказаў Юрый Аксамітны і выразіў спадзяванне на працяг такой супрацы.
Ён адзначыў, што выбар арганізацыі не быў выпадковым. Яшчэ ў 2002 годзе гурт «J:Морс» выступіў на канцэрце ў падтрымку глабальнай кампаніі «Скажам дзецям ТАК!». У 2004 годзе Уладзімір падтрымаў дзіцячае свята ў парку імя Горкага «Правы дзіцяці — твае правы». Затым у 2006 годзе ён з сям'ёй прымаў удзел у інфармацыйнай кампаніі для падлеткаў па здаровым ладзе жыцця. Два гады таму разам з артыстам быў зроблены фільм пра дзяцей у канфлікце з законам «Анёлы не спяць», а летась выканаўца ўдзельнічаў у кампаніі «5 крокаў» — пра тое, як важна ведаць свой ВІЧ-статус.
У сваю чаргу, Мары-П'ер Пуар'е распавяла, што на працягу 20 гадоў працы ў Беларусі ў арганізацыі была адзіная дакладная мэта — праліць святло на найбольш слабых, маргіналізаваных дзяцей. Гэта дзеці з інваліднасцю ці тыя, якія жывуць у спецыяльных установах, пазбаўленыя сямейнага клопату.
— Наша работа заключаецца ў тым, каб пераканацца, што гэтыя дзеці не забытыя. Спадар Пугач сёння далучаецца да сям'і міжнародных паслоў ЮНІСЕФ. Яны выконваюць важную місію: сведчаць аб тым, у якіх умовах жывуць дзеці, і дазваляюць ім стаць бачнымі ў грамадстве, — сказала рэгіянальны дырэктар.
Затым яна афіцыйна прызначыла выканаўцу паслом, уручыўшы яму нагрудны значок, які артыст доўга не мог прышпіліць да кашулі. Нарэшце адзнака была замацавана на грудзях лідара гурта «J:Морс» і ўдзельнікі завяршылі афіцыйную цырымонію прызначэння падпісаннем дагавора.
— Для мяне гэта вялікі гонар. Я атрымаў зарад бадзёрасці, упэўненасці ў сабе і сур'ёзнай адказнасці. Праекты, якія мы ажыццяўлялі з ЮНІСЕФ раней, былі несістэмнымі і кропкавымі. Гэта як падчас шпацыру па набярэжнай убачыць чалавека, які тоне, кінуць яму выратавальны круг і, пераканаўшыся, што з ім усё ў парадку, пайсці далей. А тое, што пачынаецца цяпер, у маім разуменні ўжо не прагулка па набярэжнай, а быццам ты плывеш на катары з надпісам «Паратунак». Гэта ўсё значна больш сур'ёзна, — падзяліўся развагамі Уладзімір Пугач.
Першае мерапрыемства ў якасці пасла добрай волі для Уладзіміра Пугача адбываецца ўжо гэтымі днямі: ён выступае з дакладам пра сітуацыю з правамі дзяцей у Беларусі на рэгіянальнай канферэнцыі, прысвечанай абароне дзяцей. Апроч таго, на канцэрце 22 лістапада музыка абвесціць аб старце новай ініцыятывы Дзіцячага фонду ААН.
Паслы добрай волі ЮНІСЕФ — гэта вядомыя людзі, якія садзейнічаюць рэалізацыі правоў дзяцей і актывізуюць падтрымку работы ЮНІСЕФ і партнёраў. Праца на гэтай пасадзе дабрачынная. Дагэтуль гэтую пачэсную місію ў Беларусі меў толькі тэнісіст Максім Мірны.
Дзіяна СЕРАДЗЮК
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?