З'явіўся новы аўтар, якога некаторыя смела называюць наступнікам Уладзіміра Караткевіча. Былы дырэктар невялічкай вясковай школы ў Браслаўскім раёне, Уладзімір Мажылоўскі раней пісьменніцтвам не займаўся. Аднак цяпер яго гістарычныя літаратурныя творы "выстрэльваюць" адзін за адным...
Дарэчы, з Караткевічам новага пісьменніка яднае не толькі тое, што яны цёзкі, а да таго ж і землякі — абодва з Віцебскай вобласці. Асабліва цікавым падаецца той факт, што Караткевіч пайшоў з жыцця ў 54 гады, а дэбют Мажылоўскага адбыўся акурат у тыя ж 54 гады. Сапраўды, ідзе следам за вялікім папярэднікам...
Кніга гэтага аўтара пад назвай "Праклён мітрапаліта Феафіла" нядаўна выйшла ў адроджанай серыі "Бібліятэка часопіса "Маладосць". Акрамя аповесці, якая дала назву кнізе, у ёй змешчаны "Друеўскі ваўкалак" і "Спіраль гісторыі". Галоўны рэдактар часопіса "Маладосць" і куратар кніжнай серыі Святлана Дзянісава станоўча ацаніла навінку:
— Усе творы, змешчаныя ў выданні, — гэта лёгкае гістарычнае чытанне. У такім сэнсе лёгкае, наколькі лёгкім нам здаецца чытанне Уладзіміра Караткевіча. Гістарычнай літаратуры сёння шмат, але часам яна занадта сур'ёзная, занадта гістарычная, "занавукоўленая", — а тут нязмушанае чытанне.
Уладзімір Мажылоўскі на прэзентацыі сваёй кнігі, якая адбывалася ў Выдавецкім доме "Звязда", расказаў, што пісаць пачаў выпадкова. Проста ў раённых творчых конкурсах павінна была ўдзельнічаць і яго школа. Аднак на вёсцы творчыя работы замест дзяцей часта робяць настаўнікі. Вось і сталася так, што аднойчы да 945-годдзя першай згадкі Браслава ён напісаў празаічны твор на 20 старонак машынапіснага тэксту 12-м кеглем. Ствараў яго на падставе кнігі "Памяць", у якой знайшоў ліст князя Радзівіла Чорнага да мітрапаліта Кіеўскага, там жа прачытаў, што княжна Алена памерла ў Браславе. На падставе гэтага і напісаў апавяданне. Адправіў работу на конкурс пад імем вучня. Ніякага месца там не заняў. Аднак узяў і дапісаў другую частку твора і адправіў тое, што атрымалася, у часопіс "Маладосць". Там яго надрукавалі. Уладзімір Мажылоўскі расказаў таксама, што пісанне для яго — быццам нешта звышнатуральнае:
— Я не ствараю на заказ. Саджуся за стол толькі тады, калі ў мяне ў галаве нешта зрушыцца. І ў такія моманты ўжо пішу не я, а быццам нехта іншы...Часам перачытваю і здзіўляюся: "Няўжо гэта я напісаў?.." Часам натхненне быццам ідзе з неба. Гэта можа адбывацца па-рознаму: напрыклад, гляджу фільм, мяне ўразіць пэўны эпізод, і я пачынаю нешта пісаць. Пасля надрукавання ў рэспубліканскім часопісе, зразумела, з'явіўся дадатковы імпэт: я пачаў пісаць новыя аповесці.
Аўтар расказаў, што на напісанне літаратурных твораў ідзе ўвесь яго вольны час: пісаў начамі, па выхадных, на канікулах. Жонка зрэдку нават сварылася, маўляў, ні да чога іншага яму справы няма. Аднак Уладзімір кажа, што нават на працы часам думае пра тое, як і што напісаць. Здараецца, заходзіць у пэўны тупік, не ведаючы, чым усё скончыцца.
Усе творы Мажылоўскага, па яго словах, грунтуюцца на пэўных гістарычных фактах, часта ён працуе з архівамі:
— Часам, каб знайсці адно патрэбнае слова, даводзіцца перакапаць процьму літаратуры. Ад сябе я магу прыдумаць якога-небудзь селяніна, дробнага мяшчаніна — былі яны або не, хто ведае?.. Але, напрыклад, ваяводы — толькі тыя, што жылі ў сапраўднасці. Каб іх апісаць, карыстаюся летапісамі, напрыклад Баркулабаўскім. Вялікую дапамогу ў гэтым мне аказваў Браслаўскі музей, у якім я часта працаваў. Да таго ж мой сябар Канстанцін Шыдлоўскі раіў, дзе і што можна знайсці, і сам шукаў, бываючы ў Вільнюскім, Каўнаскім архівах. Часам я заказваў у яго звесткі па пэўнай тэме, і ён прывозіў мне іх. Карыстаўся таксама двухтомнай энцыклапедыяй Вялікага Княства Літоўскага, да таго ж і інтэрнэтам.
Тыя, на каго найперш разлічаныя творы былога дырэктара школы, — гэта, зразумела, дзеці і падлеткі. Сваёй творчасцю ён імкнецца паглыбіць іх веданне гісторыі і папулярызаваць яе. Да таго ж стараецца, каб гэта была не "пустая белетрыстыка, а нешта гістарычнае".
— Я хачу паказаць, што наша гісторыя нічым не горшая, чым, напрыклад, гісторыя Англіі, Францыі. Яна таксама вельмі багатая. Я не валодаю пісьменніцкім дарам, я проста рамеснік. Аднак у нашым мінулым столькі цікавага — хочацца ўсё гэта развіць. Такія гісторыі кахання ў нашых князёў былі, што куды да іх Рамэа і Джульеце!..
Станоўча творчасць новага пісьменніка, які, нягледзячы на сталы ўзрост, толькі нядаўна з'явіўся ў друку, станоўча ацаніла і пісьменніца, літаратурны крытык Людміла Рублеўская:
— Думаю, усе мы павінны ўзрадавацца, што ў нас з'явіўся такі пісьменнік. Я асабіста вельмі рада, што ў гэтую нішу, амаль не запоўненую, якую я таксама імкнуся насычаць, прыйшоў перспектыўны працаўнік, аднадумца. Беларуская гісторыя — гэта тэра інкогніта для нас. Нам здаецца, што мы нешта ведаем, бо сапраўды цікавімся, чытаем. Аднак Уладзімір Мажылоўскі, кантактуючы са школьнікамі, ведае, як усё насамрэч. Часам нават у артыкулах калег даводзіцца чытаць, што, каб не Пётр І, сядзелі б нашы продкі ў церамах, насілі б бароды. У іх няма ўсведамлення, што, калі там кіраваў Пётр І, у нас ладзіліся балі, на якіх дамы танчылі з дэкальтэ... Таму трэба казаць нават пра гістарычны лікбез. Тое, што робіць спадар Уладзімір, — гэта надзвычай карысна, гэта павінна быць папулярызавана, ацэнена. Я часта чытаю літаратурныя гістарычныя творы, што дасылаюць на розныя конкурсы. І бачу, што ёсць праблема — у іх адсутнічае беларусацэнтрычнасць. Нам жа патрэбны такія творы, як піша Мажылоўскі, дзе на нашу гісторыю мы глядзім вачыма беларускага народа.
Ніна ШЧАРБАЧЭВІЧ.
Сумесныя праекты ядзерных тэхналогій.