Родная акруга для Аксаны КАВАЛЬКОВАЙ, як і родны горад, — Мазыр. І менавіта землякі адыгралі вырашальную ролю ў прыняцці рашэння аб балаціраванні ў кандыдаты ў дэпутаты Палаты прадстаўнікоў. Яны далі ёй наказ: «Аксана Міхайлаўна, працуйце ў парламенце, рабіце большае для людзей, для краіны». У гэты час землякі ўжо добра ведалі дырэктара школы і члена Савета Рэспублікі Аксану Кавалькову, у якой слова не разыходзіцца са справай і якая дапамогу людзям яшчэ з маладосці вызначыла мэтай свайго жыцця.

Слухаць і пачуць людзей

— Работа з выбаршчыкамі — неад’емная частка маёй дзейнасці, — кажа Аксана Кавалькова. — Бо дэпутат — гэта правадыр дзяржаўнай палітыкі ў акрузе, ён павінен сустракацца з працоўнымі калектывамі, весці асабісты прыём грамадзян. Гэта трэба мне, каб валодаць сітуацыяй на месцах, гэта трэба людзям, каб яны ведалі, дзе можна знайсці дапамогу і падтрымку.

У сваёй дэпутацкай дзейнасці Аксана Міхайлаўна цесна ўзаемадзейнічае з мясцовымі выканаўчымі і распарадчымі органамі, раённымі арганізацыямі і прадпрыемствамі, грамадскімі арганізацыямі і палітычнымі партыямі. Для дэпутата Кавальковай важна не толькі данесці да людзей інфармацыю. Ёй важна іх выслухаць і пачуць.

— Каб зносіны з грамадзянамі не былі фармальнымі, запаміналіся, выкарыстоўваю самыя розныя формы, — кажа яна. — Дыялогавыя пляцоўкі, круглыя сталы, экскурсіі, сустрэчы, асабістыя прыёмы, удзел у пасяджэннях — гэта тое, што дае магчымасць прааналізаваць сітуацыю на месцах, атрымаць прамы кантакт з людзьмі, ацаніць правільнасць прынятых рашэнняў, убачыць наспелыя праблемы і намеціць шляхі іх вырашэння.

— Вядома, кожны прыходзіць на прыём са сваёй канкрэтнай праблемай, але я бачу сітуацыю ў комплексе і раблю выснову, якія тэмы, якія кірункі выклікаюць найбольшыя пытанні ў насельніцтва. Калі тэма зваротаў паўтараецца, значыць, ёсць праблема агульная, патрэбны змены. Так мы атрымліваем актуальную базу для заканатворчай дзейнасці, — дзеліцца парламентарый.

Талакой заўжды лепш

У сваёй акрузе Аксане Кавальковай даводзіцца вырашаць самыя розныя пытанні.

— Гэта і абсталяванне безбар’ернага асяроддзя, і рамонт будынкаў, і дзейнасць кафэ ў жылым мікрараёне, якое, на думку мазырчан, перашкаджае ім жыць спакойна, і шмат іншых, — дзеліцца яна. — Я ніколі не стаўлю перад сабой задачу прыняць як мага больш людзей, так бы мовіць, для птушачкі. Я сапраўды жадаю дэталёва разабрацца ў кожнай праблеме.

Людзі гэта бачаць, таму і звяртаюцца да свайго дэпутата: гэта давер, што дарагога варта.

— Ёсць некаторыя прапановы, пытанні, якія мне па аб’ектыўных прычынах не ўдалося вырашыць, але яны ўзяты на кантроль для рэалізацыі ў найбліжэйшы час, — прызнаецца Аксана Міхайлаўна.

Некаторыя праблемы вырашаюцца, як кажуць, усім светам — насельніцтвам, дэпутатамі, выканаўчай уладай. У чэрвені па Гомельшчыне прайшоў ураган. Моцны парывісты вецер, ліўні і навальніцы нарабілі нямала бед, без святла засталіся 72 населеныя пункты. Найбольш з-за непагадзі пацярпелі тры раёны, у тым ліку і Мазырскі.

— Паваленыя дрэвы, знесеныя дахі, пашкоджаныя аўтамабілі — стыхія прайшла па Мазыры і раёне разбуральным фронтам, — успамінае Аксана Кавалькова. — У раёне рабілі ўсё магчымае і немагчымае, каб ліквідаваць наступствы.

Цяпер, паводле слоў дэпутата, асаблівая ўвага — аднаўленню ляснога фонду. Пасадка насаджэнняў праходзіць паэтапна, і да канца 2025-га пытанне адраджэння лесу ў рэгіёне павінна быць закрыта.

Год добраўпарадкавання: кожны дзень і поўным ходам

— Мазыр — адзін з найпрыгажэйшых гарадоў Беларусі, а дзякуючы рэльефу яшчэ і ўнікальны, — расказвае парламентарый. — Тут прыемна і камфортна жыць, а самі мазыране — народ не толькі працавіты, але і вельмі крэатыўны. Трохі сапсавала сітуацыю стыхія, аднак работа па навядзенні парадку на зямлі ідзе кожны дзень і поўным ходам. Прыемна назіраць, з якім задавальненнем удзельнічаюць ва ўсіх мерапрыемствах жыхары Мазыра, раёна, як мяняецца іх мысленне і яны ўжо не дзеляць свой родны горад і вёску на сваё і чужое. Яны хвалююцца за агульную справу, разумеюць, што кожны можа зрабіць свой унёсак у стварэнне камфортнага асяроддзя для ўласнага жыцця.

Мазыране, па словах дэпутата, самастойна робяць сваё жыццё прыгажэйшым, пакінулі ў мінулым скаргі ў ЖКГ і таварыствы ўласнікаў і самі разбіваюць каля сваіх пад’ездаў клумбы і кветнікі, высаджваюць хмызнякі. Добры прыклад таксама заразлівы — гледзячы на суседзяў, да работы па добраўпарадкаванні далучаюцца жыхары іншых дамоў.

— Мурал з партрэтам Героя Савецкага Саюза капітана Антона Рыжкова з’явіўся на сцяне 11-павярховага дома і ўпрыгожыў аднайменную вуліцу. Пачаты падрыхтоўчыя работы па стварэнні мурала па вуліцы Малініна, члены патрыятычных клубаў высадзілі алеі Славы, навялі парадак на мемарыяльных комплексах, — пералічвае Аксана Кавалькова. — Арганізацыі і прадпрыемствы прыводзяць у парадак і эстэтычна афармляюць прыпыначныя павільёны, агароджы, лесвіцы і іншыя элементы знешняга добраўпарадкавання.

Важныя аб’екты прыдамавой інфраструктуры — зоны адпачынку для дзяцей і дарослых становяцца бяспечнымі і набываюць сучасны і дагледжаны выгляд.

— Радуюць ініцыятывы моладзі па паляпшэнні гарадскога асяроддзя, натхняе, што ў грамадскую дзейнасць уключаецца ўсё больш навучэнцаў і студэнтаў, — канстатуе Аксана Міхайлаўна. — Трэба, вядома, жыць сучаснасцю, але абавязкова думаць аб будучыні. Моладзь — гэта і ёсць наша будучыня, і на прыкладзе дарослых людзей яна павінна зразумець, што зусім няважна, на якой пасадзе і дзе працуе чалавек — мы ўсе жывём у адным доме, карыстаемся аднымі дарогамі, дыхаем адным паветрам. Трэба ўсё гэта берагчы — і не падчас чарговай акцыі, а кожны дзень, гадзіну, хвіліну.

Алена ВІНАГРАДАВА

Фота з архіва Аксаны Кавальковай і з адкрытых крыніц