Юбілей — гэта заўсёды мітусня. Але мітусня прыемная, з гасцямі, падарункамі і віншаваннямі. Гэтымі днямі ў БДТУ вельмі ажыўлена — у ВНУ прыехалі старыя сябры і новыя партнёры з розных куткоў свету. Кіраўніцтва ўніверсітэта вырашыла сумясціць святочныя мерапрыемствы з дзелавымі і арганізавала «Тыдзень навукі, адукацыі і інавацый», прысвечаны 95-годдзю БДТУ. Падзяліць свята з калегамі, а заадно прыняць шэраг важных рашэнняў і падпісаць дакументы аб далейшым супрацоўніцтве ў Мінск прыбылі дэлегацыі з Расіі, Кітая і Азербайджана.
Геаграфія пашыраецца
Як расказаў рэктар БДТУ Сяргей КАСПЯРОВІЧ, універсітэт цесна супрацоўнічае з шэрагам замежных універсітэтаў па розных кірунках, у прыватнасці — па развіцці тэхналогій нафтаперапрацоўкі тонкіх хімічных тэхналогій і іншых.
— У рамках узаемадзеяння рэалізуюцца сумесныя навуковыя праекты, праекты мабільнасці вучоных і студэнтаў, а таксама шэраг сумесных адукацыйных праграм у такім фармаце, як, да прыкладу, летнія школы, — расказаў кіраўнік ВНУ.
Ён канстатаваў, што геаграфія экспарту адукацыйных паслуг пашыраецца з кожным годам, і цяпер у БДТУ атрымліваюць адукацыю студэнты з больш чым 45 краін.
— Лідзіруюць у гэтай статыстыцы Расія і Кітай, — адзначае Сяргей Каспяровіч. — У нас вучыцца больш за 670 грамадзян РФ і КНР.
Новыя спецыяльнасці: сёння і ў перспектыве
У 2025 годзе ў БДТУ былі адкрыты дзве новыя спецыяльнасці — «Праектаванне і тэхналогія беспілотных авіяцыйных комплексаў» і «Хімічная тэхналогія энерганасычаных матэрыялаў і вырабаў». На спецыяльнасці «Палімерныя матэрыялы» адкрылася прафілізацыя «Тэхналогія скуры і футра».
— Мы не толькі адкрываем новыя спецыяльнасці, — падзяліўся рэктар універсітэта, — але і развіваем базавыя напрамкі: лясная гаспадарка, хімічныя і нафтахімічныя тэхналогіі. Яны вельмі запатрабаваны ў сённяшніх абітурыентаў. Па-ранейшаму ў топе ІT-тэхналогіі. Вельмі добра прайшоў набор на новую спецыяльнасць «Праектаванне і тэхналогія беспілотных авіяцыйных комплексаў».
У планах — адкрыць падрыхтоўку па спецыяльнасцях «Інжынерная эканоміка» і «Прамысловая робататэхніка». Мяркуем, што набор будзе адкрыты на 2027/28 навучальны год. Пакуль прапрацоўваем, наколькі гэтыя спецыяльнасці будуць запатрабаваны. Калі казаць пра больш далёкія перспектывы, то ў планах — падрыхтоўка спецыялістаў у сферы штучнага інтэлекту. Неабходны патэнцыял маецца.
Новая якасць інжынернай адукацыі
Сёлета абітурыентамі беларускіх ВНУ сталі каля 2,5 тысячы выпускнікоў інжынерных класаў. Гаворачы пра гэтую адукацыйную траекторыю, рэктар БДТУ адзначыў:
— Маё меркаванне: інжынерныя класы — гэта вельмі добры і перспектыўны прафарыентацыйны праект. Паводле тых звестак, якія маю, каля 70 % выпускнікоў профільных класаў паступілі менавіта на інжынерныя спецыяльнасці. Наш універсітэт выбралі 199 чалавек, якія аказаліся вельмі падрыхтаванымі абітурыентамі. У большасці сваёй яны паступалі на конкурснай аснове, хоць і мелі права на льготу. Ці трэба казаць пра тое, што сёння гэтыя маладыя людзі сталі ўжо моцнымі студэнтамі, а ў будучыні стануць моцнымі спецыялістамі.
Карысны падарунак
2 снежня да свайго юбілею БДТУ атрымаў яшчэ адзін падарунак — там адкрылася сучасная вучэбная лабараторыя фармацэўтычных тэхналогій, створаная на базе кафедры біятэхналогіі пры падтрымцы і дапамозе прадпрыемства «Белмедпрэпараты».
У новай лабараторыі будуць праводзіцца заняткі па такіх профільных дысцыплінах, як «Тэхналогія гатовых лекавых сродкаў», «Кантроль якасці і сістэмы стандартызацыі. Арганізацыя вытворчасці па GMP», «Хімія і тэхналогія біялагічна актыўных рэчываў», а таксама практычная падрыхтоўка па спецыяльнасці «Тэхналогія лекавых прэпаратаў».
Лабараторыя аснашчана сучасным прыборным і тэхналагічным абсталяваннем, з дапамогай якога будучыя спецыялісты будуць адпрацоўваць практычныя навыкі ва ўмовах, максімальна набліжаных да вытворчых. І гэта забяспечыць паглыбленне студэнтаў у рэальныя працэсы фармацэўтычнай вытворчасці.
У перспектыве лабараторыя ўвойдзе ў склад Цэнтра кампетэнцый БДТУ, і яе рэсурсы можна будзе выкарыстоўваць для пашырэння прафесійных навыкаў навучэнцаў каледжаў.
Алена ВІНАГРАДАВА
Фота дадзена БДТУ
