Прамежкавых выпрабаванняў перад самым галоўным іспытам ужо не будзе. Зусім хутка для дзясяткаў тысяч беларускіх старшакласнікаў пачнецца адказная пара — паступленне ў ВНУ. Многія з іх паспрабавалі свае сілы ў рэпетыцыйных тэсціраваннях, якія пачаліся ў кастрычніку 2025 года і працягваліся да красавіка 2026-га. У студзені гэтага года старшакласнікі таксама адрэпеціравалі цэнтралізаваны экзамен. Такім чынам, была магчымасць не толькі знайсці і прааналізаваць памылкі, але і папрацаваць над імі. А наперадзе між тым яшчэ цэлы месяц, каб дашліфаваць свае веды да дасканаласці.

У Міністэрстве адукацыі паведамілі, што сёлета здаваць ЦЭ будуць 59,1 тысячы выпускнікоў. Да сярэдзіны красавіка колькасць тых, хто зарэгістраваўся на ЦТ, склала 48,6 тысячы. 

У тройку самых папулярных сярод школьнікаў прадметаў увайшлі руская мова, матэматыка і грамадазнаўства. А ў абітурыентаў самай папулярнай пакуль застаецца англійская мова, на другім месцы — фізіка, на трэцім — матэматыка. Спецыялісты Мінадукацыі ўдакладнілі, што хімію, фізіку і геаграфію многія абітурыенты плануюць здаваць на ЦТ.

ЦТ: калі і што

Спадзяёмся, што ўсе абітурыенты пасля рэгістрацыі на цэнтралізаванае тэсціраванне забралі пропуск на папяровым носьбіце, таму што для допуску на ЦТ дакумент патрабуецца менавіта ў такой форме.

Здача цэнтралізаванага тэсціравання пачнецца 26 мая. У гэты дзень абітурыенты змогуць здаць грамадазнаўства, хімію, фізіку, гісторыю Беларусі ў кантэксце сусветнай гісторыі, матэматыку, біялогію, замежныя мовы (англійская, нямецкая, французская, іспанская, кітайская) і геаграфію.

Дадатковыя даты размеркаваны так:

• 2 чэрвеня — матэматыка, біялогія, замежныя мовы і геаграфія;

• 5 чэрвеня — грамадазнаўства, хімія, фізіка, гісторыя Беларусі ў кантэксце сусветнай гісторыі.

Экзамены па рускай і беларускай мовах прызначаны на 29 мая.

Адзінаццацікласнікі здадуць два цэнтралізаваныя экзамены:

• 26 мая — прадмет на выбар (фізіка, матэматыка, хімія, біялогія, замежная мова, геаграфія, грамадазнаўства або гісторыя Беларусі ў кантэксце сусветнай гісторыі);

• 29 мая — руская або беларуская мова.

Пачатак тэсціравання па ўсіх прадметах — у 11.00.

Ёсць рэзерв!

Зарэгістравацца для ўдзелу ў тэсціраванні ў рэзервовыя дні можна з 8 да 11 чэрвеня. У РІКВ растлумачылі, хто з абітурыентаў можа прайсці цэнтралізаванае тэсціраванне ў гэтыя даты:

— Гэта абітурыенты, якія з-за хваробы або па іншых пацверджаных дакументальна прычынах, што ад іх не залежалі, не змаглі прайсці ЦТ у асноўныя дні па тых прадметах, на якія былі зарэгістраваныя.

У інстытуце адзначылі яшчэ адзін важны нюанс для такіх абітурыентаў: рэгістрацыю для праходжання тэсціравання неабходна ажыццявіць самастойна ў пунктах рэгістрацыі. Зрабіць гэта ў электронным выглядзе нельга.

Рэзервовымі днямі, прызначанымі для абітурыентаў, якія не змаглі прайсці тэсціраванне ў асноўны дзень па ўважлівай прычыне, вызначаны:

• 8 чэрвеня — усе прадметы;

• 20 чэрвеня — усе прадметы, акрамя моў;

• 22 чэрвеня — руская і беларуская мовы.

З правам без ЦТ

У 2026 годзе ад здачы цэнтралізаванага тэсціравання могуць быць вызвалены пераможцы абласных/рэспубліканскіх алімпіяд (па прадмеце алімпіяды), выпускнікі профільных ваенна-патрыятычных класаў/клубаў, медалісты каледжаў, выпускнікі Нацыянальнага дзіцячага тэхнапарка.

Пры гэтым паступаючыя на мэтавае навучанне (з балам атэстата ад 7) і шэраг іншых катэгорый вызваляюцца ад часткі выпрабаванняў, але ЦЭ застаецца абавязковым для ўсіх выпускнікоў школ.

Пашпарт, пінжак і вада без этыкеткі

У РІКВ нагадалі, што на ЦТ трэба абавязкова ўзяць пашпарт (або від на жыхарства, або даведку аб страце дакумента), пропуск на адпаведны прадмет. Спецыялісты парэкамендавалі праверыць іх наяўнасць напярэдадні вечарам — бывалі выпадкі, калі абітурыенты забывалі дакумент і з-за гэтага не змаглі прайсці тэсціраванне.

З абавязковых рэчаў — чорныя гелевыя/капілярныя ручкі (лепш дзве-тры). Трэба праверыць іх, каб не «мазалі», таму што бланкі сканіруюцца. На фізіку і хімію дазволена ўзяць найпрасцейшы калькулятар. Можна мець з сабой ваду ў бутэльцы, але толькі без этыкеткі.

На ЦТ неабходна прыходзіць за 30–40 хвілін да пачатку. Стыль адзення — дзелавы.

Майце на ўвазе

Цяпер усе ВНУ праводзяць гарачыя лініі, па якіх можна ўдакладніць любую інфармацыю па ўступнай кампаніі гэтага года. Такая ж лінія працуе і ў Міністэрстве адукацыі па тэлефоне +375 17 2224312. Тэлефанаваць можна ў буднія дні з 09.00 да 18.00, абедзенны перапынак — з 13.00 да 14.00.

Алена ВІНАГРАДАВА

Фота Лізаветы ГОЛАД