Сеткавае выданне zviazda.by

У ноч з 8 на 9 студзеня Віцебшчына апынулася ва ўладзе актыўных атмасферных франтоў цыклону. Па інфармацыі філіяла «Віцебскаблгідрамет», за некалькі гадзін на рэгіён абрынулася амаль дэкадная норма ападкаў. Вышыня снежнага покрыва вагаецца ад 17 да 32 сантыметраў. Парывы ветру дасягалі 15-16 метраў за секунду. Сітуацыю пагаршае мароз да мінус 8-13 градусаў. Прагназуецца, што 10 студзеня сітуацыя істотна не зменіцца, таму расслабляцца не выходзіць. 

Не думаю, што хтосьці будзе спрачацца з тым, што беларусы ўжо адвыклі ад снежных зім. Хутчэй, так званая еўразіма стала нормай. Апошні магутны снегапад быў у 2021 годзе, калі на сінявокую абрынуўся «Ларс». Выдатна памятаю тую непагадзь! Я тады жыла ў прыватным сектары, снегу было па пояс у двары, а на хвіліначку мой рост 170 см. Тады мой дзень пачынаўся ў 5 раніцы з ачысткі двара. У шоку, канешне, была не толькі я. І вось праз 5 гадоў снег зноў вярнуўся ў Беларусь, але на гэты раз ён стаў не каменем спатыкнення, а нават у некаторым родзе аб’яднаў людзей. Але пра ўсё па парадку.

Бліжэй да наступнага чацвярга — да мінус 30 °C

Як паведамілі ў Міністэрстве транспарту і камунікацый, сёння прымаюцца ўсе меры па забеспячэнні дарожнай бяспекі. 

У чацвер вечарам Магілёўскую вобласць накрыў цыклон. Усё было амаль па словах знакамітай песні. Снег сыпаў так, што ў лічаныя хвіліны вуліцы Магілёва сталі малапраходнымі. У вобласці быў аб’яўлены чырвоны ўзровень бяспекі. Камунальная тэхніка працавала, пачынаючы з вечара ўсю ноч. У рэгіёне быў уведзены комплексны план мерапрыемстваў па забеспячэнні бяспекі дарожнага руху «Надвор’е». У Магілёве, напрыклад, былі арганізаваныя дадатковыя патрулі, якія аказвалі вадзіцелям дапамогу на дарозе. А ноччу нарады ДАІ суправаджалі калоны спецтэхнікі, якая займалася расчысткай снегу. Гэта было трэба, каб зрабіць спецтранспарт прыкметным на дарозе. 

Да барацьбы са снегам актыўна далучаюцца жыхары рэгіёна. Прадпрыемствы, арганізацыі, установы, прадстаўнікі тэрытарыяльнага грамадскага самакіравання выходзяць на расчыстку тэрыторый, дапамагаюць камунальным службам у складаных умовах бесперапыннага снегападу. 

Куды вывозяць снег з мінскіх вуліц, расказалі БелТА ва УП «Мінскводаканал».

У Магілёўскім гарвыканкаме прайшло пасяджэнне сітуацыйнага штаба, на якім абмяркоўваліся пытанні работы ўсіх структур падчас ліквідацыі наступстваў моцнага снегападу, паведаміла БелТА.