Сеткавае выданне zviazda.by

Перманентная нявызначанасць стала амаль абавязковай тэмай любога дыскурсу ў постковідную эпоху. Гэту праблему абмяркоўвалі і на палях ХХХVІІ Міжнароднай навуковай канферэнцыі «Праблемы прагназавання і дзяржаўнага рэгулявання сацыяльна-эканамічнага развіцця», арганізаванай Навукова-даследчым эканамічным інстытутам Міністэрства эканомікі. Падобны дыскурс на гэтай аналітычнай пляцоўцы адбываецца не ўпершыню. Але сёлета змянілася парадыгма. Гаварылі не пра тое, як змагацца з нявызначанасцю, — гэта амаль бескарысна ў існуючай сістэме каардынат. Размова вялася аб якасці і механізмах кіравання эканомікай у існуючай парадыгме.

Мінулы год для эканомікі быў не самым простым. Хоць нельга назваць яго і няўдалым. Былі пэўныя ўзлёты, былі і прасадкі — але не крытычныя, звязаныя з неабходнасцю тактычнай перабудовы. Не ўсе праблемы ўдалося цалкам вырашыць, але практычна ўсё — купіраваць. І снежань прадэманстраваў эканамічную стабільнасць, прычым некаторыя макраэканамічныя індыкатары прадказваюць рост у гэтым годзе.