Нядаўна «Белшына» атрымала ганаровую ўзнагароду — Дзяржаўны знак якасці, які быў уручаны за перадавую прадукцыю вытворча-тэхнічнага прызначэння — шыны лінейкі Astarta SUV для легкавых аўто. Пра тое, чым адметная гэта і іншая прадукцыя бабруйскага вытворцы, у нашай размове з генеральным дырэктарам прадпрыемства Аляксандрам Кавалёвым.
— Аляксандр Валянцінавіч, сёння, калі амаль у кожнай беларускай сям’і ёсць аўтамабіль, а эканоміка краіны дынамічна развіваецца і ўдасканальваецца, напэўна, праблем са збытам у вас няма?
— Так. На «Белшыне» ўстаноўлена сучаснае абсталяванне з узроўнем аўтаматызацыі да 95 %. Гэта дазваляе выпускаць якасную прадукцыю, якая адпавядае сучасным патрабаванням рынку. Апроч забеспячэння фізічных асоб, мы з’яўляемся адным з вядучых пастаўшчыкоў шын для вытворцаў аўтатранспартных сродкаў, дарожна-будаўнічай і сельскагаспадарчай тэхнікі нашай краіны. Сярод галоўных заказчыкаў — БелАЗ, МАЗ, МТЗ, «Гомсельмаш», КЗ «Растсельмаш», Пецярбургскі трактарны завод і іншыя. З імі мы пастаянна ўзаемадзейнічаем, распрацоўваем для іх шыны з запатрабаванымі характарыстыкамі, у тым ліку па індывідуальных заказах.
60 % прадукцыі «Белшыны» паступае ў Расію, сярод нашых спажыўцоў таксама Казахстан, Кыргызстан, Азербайджан, Таджыкістан, Афганістан, Туркменістан, Іран, Пакістан. У якасці перспектыўнага сегмента далёкай дугі разглядаецца Афрыка. Адначасова прапрацоўваем варыянты павелічэння продажаў у адрас контрагентаў з Егіпта, ПАР, Зімбабвэ.
— Якія інвестыцыйныя праекты рэалізоўваюцца на вашым прадпрыемстве? Раскажыце пра іх. Што дасць іх увасабленне ў жыццё?
— Завяршаем рэалізацыю інвестпраекта па стварэнні індустрыяльных шын радыяльнай канструкцыі з пасадачным дыяметрам 25–29 цаляў для самазвалаў, пагрузчыкаў і бульдозераў. Ужо рэалізавана тры чаргі праекта, у выніку чаго пастаўлена на вытворчасць 16 новых мадэляў індустрыяльных шын. Завяршаецца пастаўка і мантаж вулканізацыйнага абсталявання, што дазволіць выйсці на запланаваныя магутнасці — 19,8 тысячы штук шын на суму больш за 33 мільёны долараў у год.
Да перспектыўных можна аднесці таксама інвестпраект па павелічэнні магутнасцяў легкавога патоку завода масавых шын. Сума інвестыцый па праекце ў гэтым і наступным годзе складзе 19,3 мільёна долараў. Плануем вырабляць 400 тысяч штук у год, што дасць прырост выручкі ў 14,1 мільёна долараў. Адначасова рэалізоўваюцца і іншыя праекты, якія ўзмоцняць эканоміку як прадпрыемства, так і нашай краіны.
«Белшына» актыўна праводзіць мерапрыемствы па ўкараненні робататэхнічных комплексаў на розных тэхналагічных перадзелах, што дазволіць пазбавіцца ад чалавечага фактару і павысіць прадукцыйнасць працы. На лета плануецца ўкараніць у цэху падрыхтоўкі сыравіны робататэхнічны комплекс для зняцця кіп каўчуку з далейшай укладкай у тару.
— Што зроблена на прадпрыемстве ў рамках імпартазамяшчэння за апошнія тры гады?
— Для выканання дзяржпраграмы па імпартазамяшчэнні за апошнія тры гады спецыялістамі «Белшыны» распрацавана і асвоена 66 новых мадэляў шын. Апошнім часам з улікам распрацаванай стратэгіі развіцця мы праводзім асваенне новага пакалення нізкапрофільных легкавых шын з пасадачным дыяметрам 17-20 цаляў, развіваем лінейку прэміяльных легкавых, лёгкагрузавых і грузавых шын з палепшанымі тэхнічнымі характарыстыкамі, ствараем лінейку легкавых шын, прызначаных для эксплуатацыі на электрамабілях, асвойваем новы клас легкавых шын для паўнапрывадных пазадарожнікаў, шын нізкага ціску ULTRA FLEX для сельскагаспадарчага сектара.
Дарэчы, летась наша новая легкавая шына з усесезонным малюнкам пратэктара лінейкі Artmotіon All Seasons стала пераможцам у конкурсе сярод вытворцаў прамысловай прадукцыі «Лідары прамысловасці Рэспублікі Беларусь — 2024» у намінацыі «Прадукт года ў катэгорыі «Адкрыццё года».
— Што робіцца для таго, каб эфектыўна канкурыраваць з іншымі вытворцамі аналагічнай прадукцыі?
— Сёння нам даводзіцца працаваць ва ўмовах вялізнай канкурэнцыі, калі неабходна ўвесь час трымаць руку на пульсе. Улічваючы патрабаванні рынку і найноўшыя дасягненні шыннай прамысловасці, спецыялісты тэхналагічных і канструктарскіх службаў прадпрыемства пастаянна працуюць над абнаўленнем і пашырэннем асартыменту прадукцыі, што выпускаецца, павышэннем яе якасці.
Так, за апошнія пяць гадоў на серыйную вытворчасць пастаўлена больш за 120 новых мадэляў запатрабаваных шын.
Нашы флагманскія брэнды — летнія і зімовыя варыянты шын лінеек Artmotіon, Artmotіon HP, AstartA SUV запатрабаваных тыпаразмераў. У таварным партфелі таксама ёсць лінейка ўсесезонных шын пад брэндам Artmotіon All Seasons. Нашай прадукцыяй камплектуецца сельскагаспадарчая і лесанарыхтоўчая тэхніка, ёсць прапановы для транспарту, які эксплуатуецца ва ўмовах бездарожжа.
Інавацыйны прадукт — грузавыя індустрыяльныя шыны з пасадачным дыяметрам 25-29 цаляў пад брэндам Forcerra Іndustry. Нядаўна мы прапанавалі рынку новую лінейку легкавых шын прэміум-класа Artmotіon PREMІUM. Асноўнай ідэяй гэтага брэнда з’яўляецца захаванне і папулярызацыя нацыянальных традыцый Рэспублікі Беларусь.
У афармленні бакавіны прэміяльных шын прыменены беларускія графічныя элементы — арнаменты, сімвалы, руны, абярэгі, выкананыя ў асіметрычнай манеры. Унікальныя NANO-сумесі, распрацаваныя па фірменнай тэхналогіі GREEN MAGІC, надаюць шынам добрыя цягава-счэпныя ўласцівасці на сухой і мокрай дарозе, а таксама зніжаюць супраціўленне качэнню, што дазваляе істотна эканоміць на паліве.
Фота з архіва прадпрыемства.
