Для тых, хто па ўважлівых прычынах не змог прайці ЦЭ і ЦТ разам з усімі, шанц нагнаць астатніх прадставіцца 19, 21 і 23 чэрвеня. У гэтыя дні абітурыентаў на выпрабаванні будзе чакаць Беларускі дзяржаўны ўніверсітэт. У выпрабаваннях прымуць удзел 671 чалавек, з іх у цэнтралізаваным экзамене — 242 (у 2024 годзе — 227), у цэнтралізаваным тэсціраванні — 429 (у 2024-м — 395).
19 чэрвеня можна напісаць тэст па любым прадмеце, але толькі тым, хто прапусціў па ўважлівай прычыне ЦТ. 21 чэрвеня можна напісаць тэст па профільным прадмеце тым, хто прапусціў альбо ЦЭ, альбо ЦТ у асноўныя дні. 23 чэрвеня напішуць тэставыя ЦЭ і ЦТ па рускай або беларускай мове. Самым масавым прадметам па колькасці зарэгістраваных у рэзервовыя дні на ЦЭ з’яўляецца руская мова — 108 чалавек, а сярод профільных прадметаў — грамадазнаўства, якое напішуць 50 чалавек.
На ЦТ больш за ўсё чакаецца абітурыентаў на рускай мове — 106, а сярод профільных прадметаў — на матэматыцы, з колькасцю 78 абітурыентаў. Ва ўсе дні ў БДУ ЦЭ і ЦТ будуць праводзіцца толькі ў адным корпусе — юрыдычным. Задзейнічаны 10 аўдыторый. Для працы ў якасці арганізатараў прыцягнуць больш за 70 выкладчыкаў БДУ.
Тым часам учора сталі вядомыя вынікі другога з двух асноўных дзён правядзення цэнтралізаванага тэсціравання — 5 чэрвеня 2025 года. У гэты дзень у цэнтралізаваным тэсціраванні па 4 профільных вучэбных прадметах (фізіцы, хіміі, гісторыі Беларусі і грамадазнаўстве) удзельнічалі 29,2 тысячы абітурыентаў.
Максімальна магчымы вынік — 100 балаў — удалося атрымаць 99 абітурыентам, у тым ліку 35 — па грамадазнаўстве, 46 — па хіміі, 11 — па фізіцы, 7 — па гісторыі Беларусі. Сярэдні тэставы бал па грамадазнаўстве — 59,8 бала, па фізіцы — 55,2, па гісторыі Беларусі — 53,8, па хіміі — 48,9 бала. Сертыфікаты ЦТ абітурыенты змогуць атрымаць з 1 ліпеня ў пунктах правядзення цэнтралізаванага тэсціравання, дзе яны прымалі ўдзел.
Алена ВІНАГРАДАВА
