Найлепшых выбіралі з 11 беларускіх спектакляў. Самая лепшая ў катэгорыі драматычнага тэатра — пастаноўка «Трыбунал», якую ў канцы мінулага сезона ажыццявіў Аляксандр Казак у Брэсцкім акадэмічным тэатры драмы. Пераважна на сцэне былі творы пра вайну, як яе адчувалі беларускія аўтары. Напрыклад, Аляксей Дудараў у драме «Радавыя» — яе ўвасобіў Тэатр-студыя кінаакцёра Нацыянальнай кінастудыі «Беларусьфільм», Аляксандр Яфрэмаў атрымаў прыз за найлепшую рэжысуру. «А зоры тут ціхія» Купалаўскага паводле расійскага пісьменніка Барыса Васільева цяпер адзначаны за «Найлепшую сцэнаграфію» — мастак-пастаноўшчык Аляксандр Камянец. Выканаўцаў найлепшай мужчынскай і жаночай роляў знайшлі ў пастаноўках паводле беларускіх аўтараў. Дзяніс Фешчанка атрымаў узнагароду за ролю ў спектаклі Мінскага абласнога драматычнага тэатра «Сем трафеяў радавога Шапкіна» паводле Васіля Ткачова, а Вераніка Буслаева — за работу ў спектаклі «Хатыня» Рэспубліканскага тэатра беларускай драматургіі паводле аповесці Алены Кобец-Філімонавай. Маладзёжны тэатр эстрады да 80-годдзя Перамогі падрыхтаваў гістарычную меладраму Уладзіславы Арцюкоўскай «Без тэрміну даўнасці» — і атрымаў спецыяльны прыз журы «За найлепшае аўтарскае прачытанне тэмы Вялікай Айчыннай вайны». Сіла беларускага духу адлюстравана ў паэме «Сымон-музыка» Якуба Коласа. Яе ўвасобіў адзін з найбольш яркіх рэжысёраў Беларусі Алег Жугжда ў Гродзенскім абласным тэатры лялек, што ў дадзенай катэгорыі атрымала адзнаку «Найлепшы спектакль». Таму што «Перамога» — гэта не толькі пра вайну, але і больш глабальна: пра супрацьстаянне дабра і зла.

Ларыса ЦІМОШЫК