Арцём Цуран адзначыў, што адкрыццё новага фізкультурна-аздараўленчага комплексу чарговы раз дэманструе жаданне моладзі весці здаровы лад жыцця.

— Кіраўнік дзяржавы ўдзяляе пільную ўвагу развіццю спартыўнай інфраструктуры нашай краіны, — сказаў ён. — Менавіта таму сёння ў Мінску створаны ўсе ўмовы для развіцця кожнага віду спорту.

Ён таксама выказаў перакананасць у тым, што ФАК БДУ дазволіць моладзі рэалізаваць свае спартыўныя памкненні, прынясе станоўчыя эмоцыі і зарад бадзёрасці.

— Прыемна, што кіраўніцтва вядучага ўніверсітэта Беларусі звяртае вялікую ўвагу на вольны час сваіх студэнтаў і стварае ўсе ўмовы для іх пазанавучальнай самарэалізацыі, — далучылася да віншаванняў Наталля Елісеева.

А кіраўнік БДУ Андрэй Кароль правёў змястоўны экскурс па структуры ФАКа.

— Сімвалічна, што дата яго адкрыцця каляндарна супала з пачаткам 2026 года і другім навучальным семестрам ва ўніверсітэце, — сказаў ён. — Але самае галоўнае, наша цырымонія дае старт юбілейнай праграме 105-годдзя БДУ, пад эгідай якога пройдзе ўвесь бягучы год.

Рэктар таксама звярнуў увагу на неабходнасць і першараднасць адкрыцця другога буйнога па сваім маштабе спартыўнага аб’екта ВНУ.

— У раёне вуліцы Курчатава ў нас размешчаны тры факультэты, два студэнцкія інтэрнаты, навукова-даследчыя інстытуты і прадпрыемствы. Гэта маленькі ўніверсітэцкі гарадок, які меў патрэбу ў прасторы для заняткаў спортам, умацавання фізічнага здароўя і актыўнага адпачынку моладзі, — расказаў Андрэй Кароль.

Ён таксама адзначыў, што ФАК стаў цэласным дадаткам усяго архітэктурнага вобраза БДУ ў раёне вуліцы Курчатава. І сапраўды, будынак выкананы ў экастылі, які цалкам адпавядае яго выключнаму месцу размяшчэння — дуброве «Шчомысліцкая».

Агульная плошча комплексу складае 4 782,605 кв. м. Ён уключае дзве крытыя шматфункцыянальныя спартыўныя пляцоўкі для правядзення вучэбных заняткаў па фізічнай культуры са студэнтамі-біёлагамі, радыёфізікамі, культуролагамі, лінгвістамі і дызайнерамі.

— ФАК будзе даступны для ўсіх навучэнцаў, магістрантаў, аспірантаў і супрацоўнікаў БДУ, — падкрэсліў Андрэй Кароль. — Яны змогуць наведваць трэнажорныя і фітнес-залы з сучасным спартыўным абсталяваннем. Акрамя таго, на тэрыторыі комплексу размешчаны адкрытыя зоны для заняткаў рознымі відамі спорту.

Мяркуецца, што на пляцоўках новага комплексу будуць таксама праходзіць падрыхтоўка каманд БДУ па міні-футболе, гандболе, валейболе і баскетболе, спаборніцтвы ўніверсітэцкага і рэспубліканскага ўзроўняў.

У бліжэйшы час ФАК змогуць наведаць усе ахвотныя прадстаўнікі БДУ.

Алена Вінаградава
Фота дадзена БДУ