Як ахоўваюць лясы ад пажараў і што ёсць на ўзбраенні пажарных каманд, знаёміліся ў рамках прэс-тура Магілёўскага дзяржаўнага вытворчага лесагаспадарчага аб’яднання па пажарнай бяспецы на прыкладзе Чавускага лясгаса. 

Менавіта тут знаходзіцца адзіная ў вобласці ўзбуйненая ПХС (пажарна-хімічная станцыя), якая пераехала сюды з Бялыніцкага раёна. Як растлумачыў дырэктар Чавускага лясгаса Аляксандр Падабед, зроблена гэта ў мэтах бяспекі, паколькі адсюль бліжэй за ўсё да лясаў Краснапольскага, Чэрыкаўскага, Касцюковіцкага раёнаў, закранутых Чарнобылем. Ведамства зацікаўлена папярэджваць такія пажары і на яго ўзбраенні ёсць уся неабходная тэхніка і спецыяльная амуніцыя. 

На сённяшні дзень тэрыторыя Магілёўскай вобласці на 100 працэнтаў ахоплена сістэмай маніторынгу і ранняга выяўлення лясных пажараў «Лясны стрыж». Акрамя ўзбуйненай ПХС, дзейнічае яшчэ 29 ПХС другога і першага тыпаў, а таксама 102 пункты з наборам усяго неабходнага супрацьпажарнага інвентара. Абсталяванне ў леснікоў Магілёўскай вобласці сур’ёзнае — 64 пажарныя аўтамабілі, 4 усюдыходы, прычапныя механізмы. А яшчэ так званая лясная радыёсувязь, якая працуе на асаблівай частаце, са сваімі пазыўнымі.

У Чавускім лясгасе акрамя тэхнікі і спецрыштунка, ёсць палаткі, спальнікі, халадзільнае абсталяванне. Гэта на той выпадак, калі плошча ўзгарання складзе больш за 5 гектараў і барацьба з агнём зацягнецца. Сярод інвентара маюцца і тарфяныя ствалы для тушэння самых небяспечных — падземных пажараў. Зверху быццам усё нармальна, але калі дзейнічаць неасцярожна, можна праваліцца і апынуцца ў агністай ловушцы.

У наяўнасці ёсць і вогнетрывалая спецадзенне. «У гэтых касцюмах можна сябе камфортна адчуваць нават, калі градус стыхіі дасягне 300 градусаў», — удакладняе начальнік ПХС Уладзімір Саўчанка. 

— Пры ўзнікненні ўзгарання, паведамленне перадаецца галоўнаму ляснічаму вобласці, — кажа вядучы інжынер па ахове і абароне лесу Магілёўскага ДВЛГА Фёдар Яраслаўскі. — На месца адразу ж выязджае каманда ў складзе 5 чалавек — начальнік ПХС, кіроўца, работнікі. Калі пажар павялічваецца і нельга абысціся сваімі сіламі, запрашаюцца суседнія лясніцтва або лясгасы.

На базе Чавускага лясгаса дыслацыруецца пажарна-тэхнiчная станцыя 2 тыпу, дзе працуе 2 каманды па пажаратушэнні ў складзе 8 чалавек. Яны не пажарныя — звычайныя лесаводы, але валодаюць усімі неабходнымі навыкамі па ліквідацыі пажараў. Як толькі сістэма мініторынгу вызначае небяспечны ачаг, гучыць трывога і каманда спяшаецца на выезд.

— У гэтым годзе першае ўзгаранне было зафіксавана ў канцы сакавіка на тэрыторыі Бабруйскага раёна, — паведаміў начальнік аддзела Магілёўскага ДВЛГА Антон Бальшакоў. — За аналагічны перыяд гэтага года адбылося на 12 пажараў менш, чым летась.

Кульмінацыяй мерапрыемства стала імітацыя тушэння ляснога пажару. І хоць усё было не па сапраўднаму, адчувалася трывога. Асабліва, калі занепакоіліся птушкі. Пакуль каманда тушыла невялікія ачагі ўзгарання, над палянай кружылі два ўспалошаныя буслы. І толькі калі лесаводы збілі полымя, птушкі супакоіліся і з цікаўнасцю сталі вывучаць траншэі, спецыяльна зробленыя для лакалізацыі пажару.

—Узгаранне ў лесе гэта практычна заўсёды чалавечы фактар, — адзначыла намесніца генеральнага дырэктара Магілёўскага ДВЛГА Ірына Цысельская. — Як, зрэшты, і сцецце. Яго стала ў лясах менш, але ўсё яшчэ хапае. Многія лічаць, што паход у лес — гэта іх асабістае права, але пры гэтым забываюць свае абавязкі.

Лясгасы рэгулярна папярэджваюць насельніцтва наконт лясных пажараў, але, на жаль, парушальнікі здараюцца. Антон Бальшакоў удакладніў, што з 10 сакавіка — пачатку пажаранебяспечнага сезона — да адміністрацыйнай адказнасці ў Магілёўскай вобласці ўжо было прыцягнута 25 грамадзян.

Нэлі ЗІГУЛЯ

Фота аўтара