Пад гукі аркестра, апладысментаў, захопленых воклічаў вось ужо ў 19 раз у Магілёў завітала гэта прыгожае вясновае свята. Тэатральная моладзь сваім дынамічным перфомансам разагнала над плошчай перад драмтэатрам шэрыя хмары і ззяла сваімі ўсмешкамі не горш чым само сонейка. Мерапрыемства распачалося а палове шостай вечара. А перад гэтым на сцэне Магілёўскага лялечнага тэатра артысты Пермскага тэатра «Век Жыцця» адыгралі першы фестывальны спектакль «Носферату». Спектакль-роздум, як, дарэчы, і ўсе астанія, якія стварыў цудоўны выбітны рэжысёр з Екацерынбурга Мікалай Каляда. На жаль, рэжысёр, які неаднаразова прыязджаў на фестываль са сваім тэатрам і радаваў сваімі пастаноўкамі магіляўчан ў сёлетнім сакавіку заўчасна пайшоў з жыцця. Артысты-пермякі прысвяцілі сваё выступленне яму, падкрэсліўшы, што і для іх тэатра ён адыграў вельмі важную ролю.
Наогул ў тэатральнай афішы сёлетняга фестывалю 17 спектакляў калектываў з Беларусі, Расіі і Казахстана. Яны пройдуць на трох тэатральных сцэнах з 20 па 27 сакавіка. На сцэне Магілёўскага абласнога драмтэатра быў дадзены афіцыйны старт падзеі. З прывітальным словам да гледачоў звярнуўся намеснік старшыні Магілёўскага аблвыканкама Алег Стэльмашок, які зачытаў прывітальны адрас кіраўніка вобласці Анатоля Ісачанкі. З вуснаў кансультанта ўпраўлення прафесійнага мастацтва галоўнага ўпраўлення дзяржаўных спецыяльных культурных мерапрыемстваў і прафесійнага мастацтва Міністэрства культуры Яўгеніі Багдановіч прагучала віншаванне з падзеяй міністра культуры Руслана Чарнецкага.
Традыцыйна ў рамках форуму, акрамя паказаў спектакляў беларускіх і замежных тэатральных калектываў, адбудуцца майстар-класы, творчыя сустрэчы, будзе працаваць маладзёжная творчая лабараторыя.
Вядучыя яшчэ раз нагадалі, што ў фестывальнай афішы спрэс праслаўленыя тэатры — лаўрэаты нацыянальных і міжнародных тэатральных прэмій. Дарэчы, за час існавання форуму яго ўдзельнікамі сталі тэатры з 22 краін свету, якія адыгралі 320 спектакляў.
Па выніках форуму, як заўсёды, будуць названы тры лепшыя спектаклі па меркаванні прафесійнага журы, маладзёжнага і гледачоў. Апошнія будуць галасаваць сваімі квіткамі, кідаючы іх у скрыні, якія ўстаноўлены ў фае тэатраў. У Магілёўскім абласным тэатры гледачы могуць таксама выказваць свае меркаванні на спецыяльных стэндах, якія ўстаноўлены ў фае. Учора там з’явіліся першыя водгукі пасля спектакля Арлоўскага дзяржаўнага акадэмічнага тэатра імя І.Тургенева «Яўгеній Анегін». Цікавы пранізлівы погляд на паэму Аляксандра Пушкіна.
Нэлі ЗІГУЛЯ
Фота аўтара
